رحیم یار خان: دونوں مغوی پہلوان بازیاب، 1 اغواء کار گرفتار

05 دسمبر ، 2022

جنوبی پنجاب کے شہر رحیم یارخان میں گزشتہ ماہ اغواء کیے گئے دونوں پہلوانوں کو بازیاب کرا لیا گیا ہے جبکہ ایک ملزم کو گرفتار کیا گیا ہے۔

پولیس کے مطابق اغواء کے بعد بازیاب ہونے والے پہلوان 25 سالہ ہاشم خان اور 40 سالہ راحیل چچا بھتیجے ہیں۔

اے ایس پی شاہ زیب کے مطابق بھونگ میں گنے کی فصل میں ڈاکوؤں کی موجودگی پر کارروائی کی گئی تھی۔

انہوں نے بتایا ہے کہ اغواء کار مغویوں کو ایک سے دوسری جگہ منتقل کر رہے تھے، جس کے دوران ڈاکوؤں اور پولیس کے درمیان فائرنگ کا تبادلہ ہوا۔

اے ایس پی شاہ زیب کا مزید کہنا ہے کہ پولیس نے مقابلے کے بعد 16 روز قبل اغواء کیے گئے دونوں پہلوانوں کو بازیاب کر کے ایک اغواء کار کو گرفتار کر لیا۔

ان کا یہ بھی کہنا ہے کہ پولیس نے کارروائی سے قبل 8 سہولت کاروں کو حراست میں لیا تھا، پولیس کا آپریشن جاری ہے، دیگر ملزمان کو جلد گرفتار کر لیا جائے گا۔

واضح رہے کہ اغوا کیے گئے پہلوان ملاکھڑا کے کھلاڑی ہیں، اہلِ خانہ کے مطابق ہاشم خان اور راحیل خان نجی شوگر مل میں ملاکھڑا کھیلنے گئے تھے کہ لاپتہ ہو گئے تھے۔

دونوں کو تلاش کرنے پر ماہی چوک پر سڑک پر صرف ان کی موٹر سائیکل ملی تھی، اطلاع ملی تھی کہ دونوں کو ڈاکوؤں نے اغواء کر لیا ہے۔

قومی خبریں سے مزید