پاکستان میں افراتفری پھیلانے کی مذموم کوشش کچل دیں گے، وزیرِ اعظم

وزیرِ اعظم شہباز شریف نے بنوں اور دیگر علاقوں میں دہشت گرد کارروائیوں کی مذمت کرتے ہوئے کہا ہے کہ پاکستان میں افراتفری پھیلانے کی مذموم کوشش کچل دیں گے۔

ایک بیان میں وزیرِ اعظم شہباز شریف کا کہنا ہے کہ دہشت گردی قومی سلامتی کا حساس مسئلہ ہے، اجتماعی سوچ اور لائحہ عمل کی ضرورت ہے۔

انہوں نے کہا کہ ریاست کسی بھی دہشت گرد گروہ یا تنظیم کے سامنے نہیں جھکے گی، دہشت گردوں کے ساتھ آئین اور قانون کے مطابق نمٹا جائے گا، حکومت دہشت گردوں کی بیرونی سہولت کاری اور پناہ گاہوں کا سدباب کرے گی۔

کالعدم تنظیم القاعدہ نے نیا گروپ بنالیا، دہشتگرد کارروائیوں کی منصوبہ بندی

بہاول پورکالعدم تنظیم القاعدہ کے نئے نام کے ساتھ...

وزیرِ اعظم کا کہنا ہے کہ قوم اپنی شیردلیر افواج کے شانہ بشانہ دہشت گردی کا خاتمہ کر کے رہے گی، شہداء کی قربانیاں ضائع نہیں ہونے دیں گے۔

شہباز شریف نے کہا کہ ردالفساد اور ضرب عضب دہشت گردی کے خاتمے کے لیے اہم اقدامات تھے، مسلح افواج اور دیگر قانون نافذ کرنے والے اداروں کے جوانوں کی قربانیاں ناقابل فراموش ہیں، امن و امان کی بنیادی ذمے داری صوبوں کی ہے لیکن وفاق ان مسائل پر آنکھیں بند نہیں کر سکتا۔

ان کا کہنا ہے کہ دہشت گردی کے مقابلے کے لیے صوبوں کے ساتھ مل کر کام کریں گے، دہشت گردی کے خاتمے کےلیے نیشنل ایکشن پلان پر مکمل عملدرآمد کرائیں گے، صوبائی حکومت کی صلاحیت اور استعدادکار میں اضافہ دہشت گردی کے خاتمے میں اہم ہے۔

ان کا مزید کہنا ہے کہ وفاق صوبوں میں انسداد دہشت گردی فورس اور ڈپارٹمنٹ کی پیشہ ورانہ صلاحیت بہتر بنانے میں معاونت کرے گا، خیبرپختونخوا کاؤنٹر ٹیررازم ڈپارٹمنٹ کی ازسرنو تشکیل پر کام کریں گے۔

انہوں نے یہ بھی کہا کہ اپنی فورسز کی تمام ضروریات پوری کریں گے، فورسز کو جدید اسلحہ کی فراہمی اور پیشہ ورانہ تربیت پر توجہ دی جائے گی۔