ہم امن کیلئے تمام اختلافات بھلانے کیلئے تیار ہیں، اسد قیصر

پاکستان تحریک انصاف (پی ٹی آئی) کے رہنما اور سابق اسپیکر قومی اسمبلی اسد قیصر کا کہنا ہے کہ ہم امن کے لیے اپنے تمام اختلافات بھلانے کے لیے تیار ہیں۔

ایک بیان میں اسد قیصر نے کہا کہ ضرورت اس امر کی ہے کہ حکومت اپنے طرز عمل کو بہتر بنائے۔

انہوں نے کہا کہ کل حکومتی نمائندوں نے فون پر زبانی اے پی سی میں شرکت کی دعوت دی، کانفرنس کی دعوت دینے کا یہ بالکل بھی مناسب طریقہ نہیں، اے پی سی میں دعوت دینے کا احسن طریقہ کار ہوتا ہے۔

آل پارٹیز کانفرنس کی تاریخ تبدیل

وزیرِ اعظم شہباز شریف کی جانب سے بلائی گئی آل پارٹیز کانفرنس کی تاریخ تبدیل کر دی گئی۔

اسد قیصر کا کہنا ہے کہ ملک سنگین بحرانوں کا شکار ہے، اس وقت یکجہتی کی اشد ضرورت ہے، حکومت کا رویہ غیر آئینی ہے، ایسے میں یکجہتی کا سوال ہی نہیں ہوتا۔

پی ٹی آئی رہنما نے مزید کہا کہ حکومت کو سب سے پہلے اپنے رویوں میں سدھار لانا ہو گا۔

ان کا یہ بھی کہنا ہے کہ ہم نے اپنے دورِ حکومت میں دہشت گردی پر بہتر حکمت عملی اپنائی اور امن قائم کیا، ہماری ہر پالیسی پاکستان کے مفاد کی پالیسی تھی۔