کراچی میں اہلکاروں نے جانیں دیکر دہشتگردوں کے عزائم ناکام بنائے، گورنر پنجاب

19 فروری ، 2023

گورنر پنجاب محمد بلیغ الرحمٰن نے کہا ہے کہ کراچی میں شہید اہلکاروں نے جانوں کی قربانی دے کر دہشت گردوں کے مذموم عزائم ناکام بنائے۔

گورنر پنجاب سے گورنر سندھ کامران ٹیسوری نے ملاقات کی ہے، اس موقع پر ملکی سیاست اور باہمی دلچسپی کے امور پر تبادلۂ خیال کیا گیا۔

گورنر پنجاب نے کراچی پولیس چیف کے دفتر پر دہشت گردوں کے حملے کی مذمت کی اور رینجرز اور پولیس کے کامیاب آپریشن پر انہیں خراجِ تحسین پیش کیا۔

اس موقع پر گورنر پنجاب نے کہا کہ سب کو متحد ہو کر ملک کو دہشت گردی کے عفریت سے ایک بار پھر بچانا ہو گا۔

انہوں نے کہا کہ ملک کو بے پناہ معاشی چیلنجز کا سامنا ہے، ملکی معیشت کو ازسرِ نو مضبوط کرنا ہوگا۔

ملاقات کے دوران گورنر سندھ کامران ٹیسوری نے کہا کہ مل کر ایسا راستہ نکالنا ہے جہاں پاکستان ترقی کی طرف گامزن ہو۔

گورنر سندھ نے یہ بھی کہا کہ سب سے بڑا چیلنج دنیا میں پاکستان کو معاشی طور پر مستحکم کرنا ہے۔

واضح رہے کہ جمعے کی شب کراچی پولیس آفس پر ہونے والے حملے میں تمام دہشت گرد مارے گئے تھے جبکہ پولیس اور رینجرز اہلکار سمیت 4 افراد شہید اور 18 زخمی ہوئے تھے۔

کراچی پولیس آفس (کے پی او) پر دہشت گردوں کے حملے کے بعد قانون نافذ کرنے والے اداروں کے جوابی ایکشن کے دوران 1 دہشت گرد عمارت کی چوتھی منزل پر جبکہ 2 چھت پر مارے گئے تھے۔

قومی خبریں سے مزید