ایڈیشنل ڈی جی اینٹی کرپشن پنجاب نے معافی مانگ لی

اینٹی کرپشن پنجاب کے ایڈیشنل ڈائریکٹر جنرل وقاص الحسن نے چوہدری پرویز الہٰی کے گھر پر چھاپے کے دوران دیے گئے ریمارکس پر سب کے سامنے معافی مانگ لی ہے۔

چوہدری پرویز الہٰی کی جانب سے توہین عدالت کی درخواست پر عدالت نے ایڈیشنل ڈی جی اینٹی کرپشن کو معافی مانگنے کا حکم دیا تھا۔

ایڈیشنل ڈی جی اینٹی کرپشن وقاص الحسن نے پریس کانفرنس کے دوران کہا کہ عدالت عالیہ کے حکم پر معافی مانگتا ہوں۔

انہوں نے کہا کہ ہائیکورٹ میں ایک پٹیشن فائل کی گئی تھی جس میں اُن کے کمنٹس پر اعتراض تھا، ان کمنٹس پر سب کے سامنے معافی مانگتا ہوں۔

وقاص الحسن نے کہا کہ قانون کا ایک راستہ ہوتا ہے اور عدالتیں انصاف کیلئے فیصلہ کرتی ہیں، سرکاری ملازم ہوں، اس کے مؤقف کی تائید کر سکتا ہوں۔

صحافیوں سے گفتگو میں ایڈیشنل ڈی جی اینٹی کرپشن کا کہنا تھا کہ جن لوگوں نے کرپشن کی ہے انہیں قانون کا سامنا کرنا پڑے گا۔

انہوں نے کہا کہ پرویز الہٰی کو گرفتار کرنے گئے تھے، گھر کی گھنٹی بجا کر اُن کو مقدمے کا بتایا، جب پتھراؤ ہوا تو پولیس نے کارروائی کی، گیٹ توڑنے کیلئے بکتر بند گاڑی پولیس نے استعمال کی۔

گوجرانوالہ میں مونس الہٰی کے فرنٹ مین سہیل اصغر کے فرار سے متعلق وقاص الحسن کا کہنا تھا کہ اس کا فرار اہلکاروں کی مجرمانہ غفلت کا نتیجہ ہے جس کا مقدمہ درج ہوچکا ہے۔