غیر قانونی پاکستانی حدود میں داخل ہونیوالے بحری جہاز کے عملے کا جسمانی ریمانڈ منظور

کراچی کی عدالت نے غیر قانونی طور پر پاکستانی سمندری حدود میں داخل ہونے والے بحری جہاز کے عملے کو 15 جون تک جسمانی ریمانڈ پر ایف آئی اے کے حوالے کر دیا۔

جوڈیشل مجسٹریٹ غربی کراچی کی عدالت نے بحری جہاز کے غیر قانونی طور پر پاکستانی سمندری حدود میں داخل ہونے کے کیس کی سماعت کی۔

ایف آئی اے نے انڈونیشیا اور مصر سے تعلق رکھنے والے جہاز کے عملے کو عدالت میں پیش کر دیا۔

پاکستانی سمندری حدود میں داخلے کیلئے پیشگی اجازت لازمی قرار

وفاقی حکومت نے میری ٹائم زونز ایکٹ 2020 کی منظوری دے دی، جس کے بعد غیر ملکی جنگی، ایٹمی بحری جہازوں کے پاکستانی حدود میں داخلے کے لیے پیشگی اجازت لازم قرار دے دی گئی ہے۔

عدالت نے 8 ملزمان کو 15 جون تک جسمانی ریمانڈ پر ایف آئی اے کے حوالے کر دیا۔

ایف آئی اے کی جانب سے مؤقف اختیار کیا گیا ہے کہ بحری جہاز اجازت کے بغیر پاکستانی سمندری حدود میں داخل ہوا تھا۔

جہاز کے عملے کا مؤقف تھا کہ ہم نے بھارت جانا تھا مگر اچانک جہاز کے مالک نے منزل تبدیل کر دی تھی، ہم نے واپس عمان جانا چاہا مگر موسم خراب تھا۔