فرمان الہی
نماز کے اوقات
وزیراعظم شہباز شریف نے ن لیگ سے ناراض پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان کو وزیراعظم ہاؤس بلوالیا۔ فضل الرحمان نے دبئی ملاقاتوں پر اعتماد میں نہ لینے پر کل شکوہ کیا تھا۔
وزیراعظم نے دبئی ملاقاتوں پر سربراہ پی ڈی ایم کے خدشات دور کیے۔
وزیراعظم ہاؤس میں ہونے والی ملاقات میں سیاسی صورتحال سمیت اہم امور پر غور کیا گیا، وزیر مواصلات مولانا اسعد محمود بھی مولانا فضل الرحمان کے ہمراہ تھے، ملاقات میں موجودہ ملکی سیاسی صورتحال پر مشاورت کی گئی۔
اعلامیے کے مطابق دونوں رہنماؤں نےسویڈن میں قرآن پاک کی بےحرمتی کے واقعے پرحکومتِ پاکستان کے ردعمل کو سراہا، مولانا فضل الرحمان نے کہا کہ سویڈن کا واقعہ انتہائی افسوسناک ہے۔
وزیراعظم نے مولانا فضل الرحمان کو مشکل فیصلوں میں شانہ بشانہ کھڑے ہونے پر خراج تحسین پیش کیا۔
وزیر اعظم نے کہا کہ ملک کو معاشی مشکلات سے نکالنا اتحادیوں کے تعاون سے ممکن ہوا، انٹرنیشنل مانیٹری فنڈ (آئی ایم ایف) کے ساتھ معاہدہ کرنا اتحادیوں کے تعاون سے ممکن ہوا۔
یاد رہے کہ گزشتہ روز مولانا فضل الرحمان نے دبئی میں ہونے والی ملاقاتوں میں پی ڈی ایم کو اعتماد میں نہ لینے پر ن لیگ کو تنقید کا نشانہ بنایا تھا۔
مولانا فضل الرحمان کا کہنا تھا کہ مسلم لیگ (ن) پی ڈی ایم کا حصہ ہے، دبئی میں ملاقات پر اعتماد میں نہیں لیا گیا، اتنا بڑا قدم اٹھانے پر ہم سے مشاورت نہیں کی گئی یہ سوال میرے ذہن میں ہے۔
