فوجی عدالتوں میں سویلینز کے ٹرائل، مارشل لاء جیسی صورتِحال ہوئی تو سپریم کورٹ مداخلت کرے گی: چیف جسٹس

سپریم کورٹ آف پاکستان میں فوجی عدالتوں میں سویلینز کے ٹرائل کے خلاف درخواستوں پر سماعت کے دوران چیف جسٹس پاکستان عمر عطاء بندیال نے ریمارکس میں کہا ہے کہ سزائے موت کا موجودہ کیس سے تعلق نہیں، اگر مارشل لاء جیسی صورتِ حال ہوئی تو سپریم کورٹ مداخلت کرے گی۔

سماعت کے دوران اٹارنی جنرل نے ملٹری ٹرائل کا طریقہ کار بتا دیا۔

چیف جسٹس پاکستان عمر عطاء بندیال کی سربراہی میں 6 رکنی لارجر بینچ سماعت کر رہا ہے۔

جسٹس اعجاز الاحسن، جسٹس منیب اختر، جسٹس یحییٰ آفریدی، جسٹس مظاہر علی اکبر نقوی اور جسٹس عائشہ ملک بینچ کا حصہ ہیں۔

اٹارنی جنرل کے دلائل

دورانِ سماعت اٹارنی جنرل منصور عثمان اعوان نے روسٹرم پر آ کر دلائل دیتے ہوئے کہا کہ پچھلی سماعت پر 9 مئی کے منصوبہ بندی سے کیے گئے حملوں کی تفصیلات سامنے رکھیں، تصاویری شواہد سے ثابت ہے کہ حملے میں ملوث تمام افراد کے چہرے واضح تھے، صرف 102 افراد کو بہت محتاط طریقے سے گرفتار کیا گیا، دوبارہ سے کہنا چاہتا ہوں کہ جو 9 مئی کو ہوا ایسا تاریخ میں کبھی نہیں ہوا۔

جسٹس مظاہر علی اکبر نقوی نے استفسار کیا کہ کس طریقہ کار کے تحت لوگوں کو فوجی تحویل میں لیا گیا ہے؟

اٹارنی جنرل نے ملٹری ٹرائل کا طریقہ کار بتا دیا

اٹارنی جنرل نے کہا کہ جو 9 مئی کو ہوا اس کی اجازت مستقبل میں دوبارہ نہیں دی جا سکتی، ان واقعات کا ردِ عمل بھی اسی طریقے سے آنا تھا، عدالت کا سوال یہ ہے کہ گرفتار افراد کو منصفانہ اور فیئر ٹرائل کا حق ملے گا یا نہیں؟ پہلے عدالت کو ملٹری ٹرائل کا طریقہ کار بتانا چاہتا ہوں پھر سوالات کے جواب دوں گا، آرمی ایکٹ کے سیکشن میں سول جرائم کی بات واضح ہے، اگر کوئی سول جرم سویلین کرے تو ٹرائل آرمی ایکٹ کے تحت نہیں ہو سکتا، جب آرمی ایکٹ میں 2015ء میں ترامیم کی گئیں تو سویلینز کے ٹرائل کی شقیں شامل کی گئی تھیں۔

چیف جسٹس پاکستان نے انہیں ہدایت کی کہ آرمی ایکٹ کا سیکشن 2 پڑھیں جس میں سویلینز کے ٹرائل کی بات ہے۔

اٹارنی جنرل نے کہا کہ آرمی ایکٹ سیکشن 2 کے مطابق کوئی سویلین دفاعی کام میں رخنہ ڈالے تو وہ اس قانون کے نرغے میں آتا ہے، آرمی ایکٹ کے مطابق اگر کوئی سویلین افواج کا ڈسپلن خراب کرے تو بھی قانون کے دائرے میں آتا ہے۔

چیف جسٹس عمر عطاء بندیال نے استفسار کیا کہ افواج کا ڈسپلن کیسے خراب ہوا؟

افواج کا ڈسپلن کیسے خراب ہوا؟ چیف جسٹس

چیف جسٹس عمر عطاء بندیال نے استفسار کیا کہ افواج کا ڈسپلن کیسے خراب ہوا؟ فوجی افسر کے کام میں رخنہ ڈالنا اور ڈسپلن خراب کرنا قانون میں درج ہے یا اخذ کیا گیا؟

اٹارنی جنرل نے جواب دیا کہ یہ آرمی ایکٹ میں درج ہے۔

جسٹس یحییٰ آفریدی نے استفسار کیا کہ کیا آپ یہ کہہ رہے ہیں کہ آرمی ایکٹ بنیادی انسانی حقوق کے دائرے سے خارج ہے؟

اٹارنی جنرل نے انہیں جواب دیا کہ جی آرمی ایکٹ پر بنیادی انسانی حقوق کا اطلاق نہیں ہوتا۔

جسٹس یحییٰ آفریدی نے پھر سوال کیا کہ فوجی ہو یا سویلین، کیا آرمی ایکٹ کے تحت ٹرائل میں آنے والے بنیادی انسانی حقوق سے خارج ہوں گے؟

اٹارنی جنرل نے جواب دیا کہ عدالت کے تمام سوالات کےجوابات دوں گا پہلے آرمی ایکٹ کی ترامیم کاجائزہ لے لیں۔

جسٹس منیب اختر نے استفسار کیا کہ کیا کسی آرمی افسر کو زخمی کرنا اس کو اپنی ذمے داری ادا کرنے سے روکنے کے مترادف ہو گا؟ بنیادی انسانی حقوق کے بغیر تمام جرائم پر کورٹ مارشل کی سزا لگتی ہے، ایک طرف درج ہے کہ ریاست انسانی حقوق سے ماورا کوئی قانون نہیں بنا سکتی، دوسری طرف آپ کہہ رہے ہیں کہ اس مخصوص قانون میں تو انسانی حقوق کا اطلاق ہوتا ہی نہیں، آپ کی دلیل کی منطق سمجھنے سے قاصر ہوں۔

اٹارنی جنرل نے جواب دیا کہ اکیسویں آئینی ترمیم کے بعد سویلینز کے فوجی عدالتوں میں ٹرائل کا قانون عمل میں آیا۔

چیف جسٹس پاکستان نے استفسار کیا کہ آرمی ایکٹ میں ترمیم کے بعد سویلینز کو شامل کیا گیا ہے؟

اٹارنی جنرل نے جواب دیا کہ آرمی ایکٹ میں ترمیم سے پہلے اس قانون کا اطلاق صرف افواج پر ہوتا تھا۔

جسٹس منیب اختر نے سوال کیا کہ اگر کل پارلیمنٹ ملٹری ایکٹ میں بنیادی انسانی حقوق شامل کرنا چاہے تو کر سکتی ہے؟

اٹارنی جنرل نے جواب دیا کہ پارلیمنٹ کے پاس قانون سازی کا مکمل اختیار ہے۔

جسٹس منیب اختر نے کہا کہ یعنی ملٹری ایکٹ میں بنیادی انسانی حقوق دینا یا نہ دینا پارلیمنٹ کا اختیار ہے، یہ تو نہیں ہو سکتا کہ آج ایک پارلیمنٹ ملٹری ایکٹ میں بنیادی حقوق شامل کرے، اگلی پارلیمنٹ انہیں نکال دے، قانون بالکل واضح ہونا چاہیے۔

جسٹس اعجاز الاحسن نے کہا کہ سویلین پر فوجی ایکٹ کے اطلاق کے لیے اکیسویں ترمیم کی گئی تھی۔

جسٹس عائشہ ملک نے کہا کہ 21 ویں آئینی ترمیم نے انتظامیہ اور عدلیہ کے اختیارات میں فرق کر کے سب سے بڑا تحفظ دیا تھا، 21 ویں آئینی ترمیم میں ٹرائل میں مجوزہ طریقہ کار دے کر انسانی حقوق کا تحفظ کیا گیا تھا۔

اٹارنی جنرل نے کہا کہ عدالت کو ملٹری ٹرائل کا طریقہ کار بتانا چاہتا ہوں۔

جسٹس منیب اختر نے استفسار کیا کہ ملٹری ٹرائل کا طریقہ کار بتانے کی کیا ضرورت ہے جب بنیادی حقوق کا اطلاق ہونا ہی نہیں؟

اٹارنی جنرل جو بتانا چاہتے ہیں بتائیں: چیف جسٹس

چیف جسٹس پاکستان عمر عطاء بندیال نے اٹارنی جنرل سے کہا کہ آپ جو بتانا چاہتے ہیں بتائیں، عدلیہ کی آزادی انصاف کی بنیاد ہے، ملٹری ایکٹ کے تحت پراسیکیوشن کیس کا فیصلہ کرے گی، اپیل بھی سنیں گے، مسٹر اٹارنی جنرل! 2015ء میں جو آئین کو پسِ پشت ڈالا گیا تھا وہ اب نہیں ہو رہا، فوجی عدالت کے فیصلے کے خلاف کسی آزادانہ فورم پر اپیل کا حق بنیادی حقوق کی ضمانت ہے۔

اٹارنی جنرل نے کہا کہ ٹرائل کیسے ہو گا یہ طریقہ کار عدالت کے سامنے ہے، ملٹری کورٹس میں سب سے پہلے وقوعہ کی رپورٹ پیش کی جاتی ہے، وقوعہ کی رپورٹ کی روشنی میں کمانڈنگ افسر کورٹ آف انکوائری میں واقعے کی مکمل تفتیش کرتا ہے، تفتیش کے بعد سویلینز کو آرمی ایکٹ کے سیکشن 73 اور 76 کے تحت گرفتار کیا جا سکتا ہے، شواہد کی سمری کی ریکارڈنگ کے دوران ملزم کو جرح کا اختیار دیا جاتا ہے، جرح کے بعد آرمی ایکٹ کے رول 19 کے تحت چارج فریم کیا جاتا ہے، ملٹری ٹرائل کرنے کے لیے 3 افسران کا پینل بیٹھتا ہے، ملزمان کو تمام شواہد اور گواہان پر جرح کرنے کا مکمل حق دیا جاتا ہے۔

تیز بارش کے باعث کیس سننے میں دشواری

اس موقع پر موسلا دھاربارش کے باعث کمرۂ عدالت میں ججز کو کیس سننے میں دشواری کا سامنا کرنا پڑا جس پر جسٹس یحییٰ آفریدی نے اٹارنی جنرل کو بلند آواز میں دلائل دینےکی ہدایت کی۔

جسٹس یحییٰ آفریدی نے سوال کیا کہ ایک کمانڈنگ افسر طے کرتا ہے کہ کیس بنتا ہے یا نہیں؟

’’ملٹری ٹرائل میں اقبالِ جرم پر سزا سنا دی جاتی ہے‘‘

اٹارنی جنرل نے کہا کہ ملٹری ٹرائل کے دوران ملزمان کو وکیل کرنے کا اختیار دیا جاتا ہے، ملزمان فوج کی لیگل برانچ کا افسر یا پرائیویٹ وکیل بھی مقرر کر سکتا ہے، ملٹری کورٹس ٹرائل میں ملزم کو اقبالِ جرم یا صحتِ جرم سے انکار کا آپشن دیا جاتا ہے، ملزم کے اقبالِ جرم پر سزا سنا دی جاتی ہے، صحتِ جرم سے انکار پر ملزم کا باقاعدہ آرمی ٹرائل شروع ہو جاتا ہے، ملٹری کورٹ میں ایک افسر کو عدالتی صدر مقرر کیا جاتا ہے جو کارروائی کا آزادانہ جائزہ لیتا ہے، عدالتی صدر کی ذمے داری ہوتی ہے کہ آزادانہ اور شفاف ٹرائل کا جائزہ لے، ملٹری کورٹس میں ٹرائل کرنے والے 3 افسران کی اکثریت کا فیصلہ حتمی تصور ہوتا ہے، ملزم عمر قید یا سزائے موت کے خلاف کورٹس آف اپیل میں درخواست کر سکتا ہے، ملٹری کورٹس میں ٹرائل کے دوران ملزم کسی لیگل ایڈوائزر سے مشاورت کر سکتا ہے۔

چیف جسٹس پاکستان نے کہا کہ ملزمان کو اپنے دفاع کے لیے فوجی عدالتوں میں بہت کم وقت دیا جاتا ہے۔

ملزمان کو دفاع کا پورا وقت دیا جاتا ہے: اٹارنی جنرل

اٹارنی جنرل نے جواب دیا کہ ملٹری ٹرائلز میں ملزمان کو اپنے دفاع کا پورا وقت دیا جاتا ہے، آرمی ایکٹ کے تحت ٹرائل میں بھی فیصلہ کثرتِ رائے سے ہوتا ہے، سزائے موت کی صورت میں فیصلہ دو تہائی سے ہونا لازمی ہے۔

سزائے موت کا موجودہ کیس سے تعلق نہیں: چیف جسٹس

چیف جسٹس پاکستان نے کہا کہ سزائے موت کا موجودہ کیس سے تعلق نہیں ہے۔

اٹارنی جنرل نے جواب دیا کہ بادی النظر میں گرفتار 102 ملزمان میں سے کسی کو سزائے موت یا 14 سال سزا نہیں دی جائے گی۔

جسٹس یحییٰ آفریدی نے استفسار کیا کہ یہ ممنوعہ علاقے کیا ہوتے ہیں؟

اٹارنی جنرل نے جواب دیا کہ ممنوعہ علاقے وہ ہیں جن کا ذکر آفیشل سیکریٹ ایکٹ میں ہے۔

جسٹس عائشہ ملک نے استفسار کیا کہ ٹرائل سے پہلے آپ کیسے کہہ سکتے ہیں کہ سزا 14 سال کے بجائے 2 سال تک کی ہو گی؟

اٹارنی جنرل نے جواب دیا کہ ملٹری عدالت میں عمر قید یا سزائے موت بیرونی سازش میں ملوث ہونے پر دی جاتی ہے۔

چیف جسٹس پاکستان نے کہا کہ ساڑھے 11 بجے ایک کیس تھا، اٹارنی جنرل صاحب! آپ جو دلائل پڑھ رہے ہیں وہ جلدی ختم کر لیں۔

’’ملٹری کورٹس کے فیصلے میں تفصیلی وجوہات دی جائینگی‘‘

اٹارنی جنرل نے کہا کہ آرمی ایکٹ کے مطابق ملزم کو دفاع کا پورا حق دیا جاتا ہے، عدالت کو یقین دہانی کراتا ہوں کہ ملٹری کورٹس کے فیصلے میں تفصیلی وجوہات دی جائیں گی۔

جسٹس مظاہر نقوی نے کہا کہ سول قانون میں اپنی مرضی کا وکیل ہوتا ہے لیکن آرمی ایکٹ میں وکیل بھی افواج سے ہوتا ہے۔

’’ملٹری ٹرائل میں پرائیویٹ وکیل کرنے کا اختیار ہو گا‘‘

اٹارنی جنرل نے جواب دیا کہ یقین دہانی کراتا ہوں کہ گرفتار افراد کو ملٹری ٹرائل میں پرائیویٹ وکیل کرنے کا مکمل اختیار ہو گا۔

چیف جسٹس پاکستان نے کہا کہ اس کیس میں جو بھی ہو گا وہ قانون سازی کے ذریعے ہی ممکن ہے، آپ کے مطابق ابھی ٹرائل شروع نہیں ہوا تفتیش چل رہی ہے۔

اٹارنی جنرل نے جواب دیا کہ ابھی تک کسی ملزم کا ملٹری ٹرائل شروع نہیں ہوا۔

ٹرائل کھلی عدالت میں ہو گا: چیف جسٹس

چیف جسٹس پاکستان نے کہا کہ ملٹری ٹرائل شروع ہونے سے قبل عدالت کو آگاہ کیا جائے گا، نوٹ کر رہے ہیں کہ کوئی ٹرائل نہیں شروع کیا جائے گا، شواہد ریکارڈ کیے جائیں گے اور ٹرائل کھلی عدالت میں ہو گا۔

اٹارنی جنرل نے جواب دیا کہ ٹرائل کے دوران ملزمان کے اہلِ خانہ اور وکلاء کو آنے کی اجازت ہو گی۔

جسٹس مظاہر نقوی نے استفسار کیا کہ ملزمان کو سیل میں رکھا گیا ہے یا کمروں میں؟

اٹارنی جنرل نے جواب دیا کہ ملزمان کو جیل میں ہی رکھا گیا ہے لیکن دہشت گردوں کی طرح نہیں، گرفتار افراد کو تمام تر ضروری سہولتیں دی گئی ہیں۔

چیف جسٹس پاکستان نے ہدایت کی کہ گرفتار افراد کو دماغی یا جسمانی مشکلات کا شکار نہیں ہونا چاہیے۔

وکیل لطیف کھوسہ نے کہا کہ اٹارنی جنرل بہت ماہرانہ طریقے سے کیس لے کر چل رہے ہیں، اٹارنی جنرل یہ نہیں بتا رہے کہ فوجی تحویل میں ملزمان کو کیسے رکھا گیا ہے، کون روک رہا ہے حکومت کو قانون سازی کرنے سے؟ ٹرائل کے لیے قانون میں ترمیم کر کے عدالتیں کیوں نہیں بنا دیتے؟ ضیاء الحق کے وقت سے ملٹری ٹرائل ہو رہے ہیں۔

’’مارشل لاء جیسی صورتِحال ہوئی تو سپریم کورٹ مداخلت کرے گی‘‘

چیف جسٹس پاکستان نے کہا کہ یہ ضیاء کا دور نہیں ہے، مارشل لاء نہیں لگا ہوا، اگر مارشل لاء جیسی صورتِ حال کبھی ہوئی تو سپریم کورٹ مداخلت کرے گی۔

اٹارنی جنرل نے اپیل کا حق دینے کے معاملے پر عدالت سے مہلت کی استدعا کر دی اور کہا کہ اس معاملے پر بہت محتاط رہ کر غور کی ضرورت ہے، ایسے چلنا ہو گا کہ عالمی سطح پر ملکی پوزیشن متاثر نہ ہو، کچھ چیزوں کا میں ذکر نہیں کر رہا بہت کچھ ذہن میں رکھنا ہو گا۔

چیف جسٹس پاکستان نے اٹارنی جنرل سے سوال کیا کہ آپ کو کتنا وقت درکار ہے؟

اٹارنی جنرل نے استدعا کی کہ ایک ماہ کا وقت دے دیا جائے۔

چیف جسٹس نے کہا کہ حکومت چلی بھی گئی تو عدالت حکم کی خلاف ورزی پر متعلقہ ذمے دار سے جواب لے گی، ہم کسی ریٹائرڈ جج کو 102 افراد سے ملاقات کے لیے فوکل پرسن مقرر کر سکتے ہیں۔

اٹارنی جنرل نے عدالت سے کہا کہ اس حوالے سے میں آپ کو اِن چیمبر بتاؤں گا۔

چیف جسٹس پاکستان نے کہا کہ ہم چاہتے ہیں کہ زیرِ حراست افراد کو بنیادی حقوق ملنے چاہئیں، زیرِ حراست افراد کو اہلِ خانہ سے ملاقات کی اجازت ہونی چاہیے، سپریم کورٹ کا زیرِ حراست افراد سے متعلق گزشتہ حکم برقرار رہے گا۔

اٹارنی جنرل نے کہا کہ عدالت مزید سماعت ایک ماہ کے لیے ملتوی کر دے، کلبھوشن اور جاسوسی میں پکڑے گئے دیگر حساس مقدمات متاثر ہو سکتے ہیں۔

چیف جسٹس پاکستان نے کہا کہ عدالت باہم مشورہ کر کے آئندہ تاریخِ سماعت کے بارے میں آگاہ کرے گی، 9 مئی کے واقعات کے ملزمان کو کن حالات میں رکھا گیا ہے؟ اٹارنی جنرل کیا یہ ممکن ہے کہ وکلاء کا ایک گروپ اس حوالے سے جائزہ لے سکے؟

’’وکلاء کے گروپ کو نہیں ملزمان کے اہلِخانہ کو ملوایا جا سکتا ہے‘‘

اٹارنی جنرل نے جواب دیا کہ وکلاء کا گروپ تو نہیں ان کے اہلِ خانہ کو ملوایا جا سکتا ہے تاکہ وہ دیکھ سکیں کہ انہیں کن حالات میں رکھا گیا ہے، قیدیوں کو جیل میں نہیں بیرکس میں رکھا گیا ہے۔

چیف جسٹس پاکستان نے کہا کہ ایک ریٹائرڈ جج تو جائزہ لے سکتے ہیں کہ جیل رولز کا اطلاق ہو رہا ہے یا نہیں۔

درخواست گزاران کی حکمِ امتناع کی درخواست مسترد

سپریم کورٹ نے درخواست گزاران کی حکمِ امتناع کی درخواست مسترد کر دی۔

چیف جسٹس پاکستان نے استفسار کیا کہ جب ٹرائل ہی شروع نہیں ہوا تو کیسے حکمِ امتناع دیں؟

اس کے ساتھ ہی سپریم کورٹ کے ججز کمرۂ عدالت سے چلے گئے۔