فرمان الہی
نماز کے اوقات
پاکستان کرکٹ بورڈ کی مینجمنٹ کمیٹی کے سربراہ چوہدری ذکاء اشرف سے قومی کرکٹ ٹیم کے سابق کپتان مصباح الحق نے قذافی اسٹیڈیم لاہور میں طویل ملاقات کی، ملاقات کے بعد چوہدری ذکاء اشرف نے جیو نیوز سے گفتگو کرتے ہوئے کہا کہ سابق کپتان کرکٹ امور میں ان کے شانہ بشانہ کام کریں گے۔
چوہدری ذکاء اشرف نے بتایا کہ مصباح الحق کے ساتھ کرکٹ کمیٹی میں سابق کرکٹرز کو شامل کیا جائے گا، جو مستقبل قریب میں بورڈ کے اہم فیصلوں میں کلیدی کردار ادا کریں گے۔
نئی سلیکشن کمیٹی کے سوال پر مینجمنٹ کمیٹی کے سربراہ کا کہنا تھا کہ مصباح الحق اس معاملے میں کرکٹ کمیٹی کے فورم پر معاملات دیکھیں گے، جس کے بعد آئندہ چند روز میں کوئی تقرری عمل میں آسکتی ہے۔
ذکاء اشرف نے کہا کہ خواہش ہے کہ پاکستان کرکٹ میں کرکٹرز کے فیصلوں کی روشنی میں آگے بڑھا جائے اور اس معاملے میں خوشی ہے کہ مصباح الحق نے ہمیں اپنے بھرپور تعاون کا یقین دلایا ہے۔
انہوں نے مزید کہا کہ مصباح الحق صرف پاکستان میں کرکٹ امور میں معاونت نہیں کریں گے بلکہ وہ بین الاقوامی سطح پر بھی بورڈ کی معاونت کریں گے اور اس سلسلے میں وہ آئی سی سی اجلاس میں بھی بورڈ کی نمائندگی کریں گے۔
چوہدری ذکاء اشرف نے ڈائریکٹر میڈیا کے سوال پر بتایا کہ اس حوالے سے آئندہ چند روز میں کوئی فیصلہ کر لیا جائے گا۔
