فرمان الہی
نماز کے اوقات
پاکستان کرکٹ بورڈ (پی سی بی) انٹرنیشنل کرکٹ کونسل (آئی سی سی) ورلڈ کپ 2023ء میں قومی ٹیم کی کارکردگی کے معاملے پر مکی آرتھر کی پاکستان آمد کا منتظر ہے۔
ذرائع کے مطابق پی سی بی میگا ایونٹ میں ٹیم کی کارکردگی کے حوالے سے ٹیم ڈائریکٹر مکی آرتھر کی وطن واپسی کا منتظر ہے، جو 15 اور 16 نومبر کی درمیانی شب دبئی سے لاہور پہنچیں گے۔
ذرائع کے مطابق مکی آرتھر کی آمد کے بعد مینجمنٹ کے اراکین سے ملاقاتوں کا سلسلہ شروع ہوگا، بورڈ کو ٹیم ڈائریکٹر، ہیڈ کوچ، منیجر اور کپتان کی رپورٹ کا بھی انتظار ہے۔
ذرائع کے مطابق چیئرمین پی سی بی مینجمنٹ کمیٹی ذکاء اشرف اگلے ایک، دو روز میں کرکٹرز کے ساتھ مشاورتی عمل شروع کریں گے۔
ذکاء اشرف پیر کو پی سی بی ہیڈ کوارٹرز نہیں آئے، اُن کے مصروفیت کے باعث شہر سے باہر ہونے کی اطلاعات ہیں۔
ذرائع کے مطابق پی سی بی ملاقاتوں اور مشاورتی عمل کی تکمیل پر ہی تبدیلیاں ہونے یا نہ ہونے کا امکان ہے۔
