فرمان الہی
نماز کے اوقات
پی ٹی آئی رہنما عثمان ڈار کی والدہ نے الزام عائد کیا ہے کہ خواجہ آصف نے ایک بار پھر میرے گھر پر حملہ کرایا ہے۔
عثمان ڈار کی والدہ نے ایک ویڈیو بیان میں مسلم لیگ ن کے رہنما، سابق وفاقی وزیر خواجہ آصف پر یہ الزام عائد کرتے ہوئے کہا ہے کہ چیف جسٹس واقعے کا نوٹس لیں۔
ان کا کہنا ہے کہ کاغذاتِ نامزدگی جمع کرانے کا سن کر 20 لوگ میرے گھر بھیجے گئے مجھے زد و کوب کیا گیا۔
عثمان ڈار کی والدہ کا کہنا ہے کہ حملہ آوروں نے گھر کا مین دروازہ توڑ دیا، میری قمیض کو پھاڑ ڈالا۔
انہوں نے مزید کہا ہے کہ الیکشن کے کاغذاتِ نامزدگی جمع کرانے ضرور جاؤں گی، کوئی مجھے زد و کوب کر کے من مانی نہیں کرا سکتا۔
عثمان ڈار کی والدہ کا یہ بھی کہنا ہے کہ میں جیل میں بھی جا کر الیکشن لڑوں گی۔
دوسری جانب عثمان ڈار کی والدہ کے بیان پر مسلم لیگ ن کے رہنما خواجہ آصف نے ردِ عمل کا اظہار کرتے ہوئے کہا ہے کہ ایسی انتقامی سیاست سے میرا کوئی تعلق نہیں۔
ان کا کہنا ہے کہ میں نے ہمیشہ اپنے سیاسی مخالفین اور ان کے خاندان کا احترام کیا ہے، میری بیوی 3 درجن بار عدالتوں کی پیشیاں بھگت چکی ہیں۔
خواجہ آصف نے کہا ہے کہ میرا بیٹا جس کا سیاست سے کوئی تعلق نہیں اس کے خلاف بھی جھوٹے مقدمے بنائے گئے۔
انہوں نے مزید کہا ہے کہ میرے ان سیاسی مخالفین نے مشرف اور پی ٹی آئی حکومتوں میں میرے خلاف درخواست بازی کی۔
خواجہ آصف نے یہ بھی کہا ہے کہ میں نے دونوں ادوار میں 6، 6 ماہ قید کاٹی لیکن کچھ ثابت نہ ہو سکا، میری ذات کی سیاست عوام سے کمٹمنٹ، اصولوں اور وفاداری پر ہے۔
