فرمان الہی
نماز کے اوقات
قومی کرکٹ ٹیم کے فاسٹ بولنگ کوچ عمر گل نے کہا ہے کہ فیلڈنگ کی وجہ سے میچ کے نتیجے پر بہت اثر پڑتا ہے، آج کیچزڈراپ کرنا مہنگا پڑا۔
نیوز ی لینڈ کے خلاف پہلے ٹی 20 میچ کے بعد آکلینڈ میں پریس کانفرنس کے دوران عمر گل نے کہا کہ 200 سے زائد رنز درکار ہوں تو ایک دو بڑی پارٹنرشپ کی ضرورت ہوتی ہے۔
انہوں نے مزید کہا کہ اس گراؤنڈ کی تاریخ ہے یہاں 200 سے زائد رنز کا ہدف حاصل کیا جاچکا ہے۔
فاسٹ بولنگ کوچ نے یہ بھی کہا کہ ان پچز پر کھیل سے آگاہی بہت ضروری ہے، محمد حفیظ نے نشاندہی بھی کی تھی پچ کے گرد ہی دوڑنا ہے۔
ان کا کہنا تھا کہ صائم ایوب نے آغاز اچھا کیا لیکن بدقسمتی سے وہ رن آوٹ ہوگئے، ہمیں آغاز تو اچھا ملا لیکن ہمیں ایک لمبی پارٹنرشپ کی بھی ضرورت تھی۔
عمر گل نے کہا کہ عباس کو میچ سے پہلے اور میچ کے دوران بتایا تھا ہارڈ لینتھ کو استعمال کرنا ہے، سلواور ورائٹی کےساتھ بولنگ کرنے کےلیےکہا تھا۔
انہوں نے کہا کہ عباس آفریدی نے ڈومیسٹک میں اچھا پرفارم کیا ہوا ہے، وائٹ بال کرکٹ میں فیلڈنگ کی بہت ضرورت ہوتی ہے۔
فاسٹ بولنگ کوچ نے کہا کہ فیلڈنگ کی وجہ سے میچ کے نتیجے پر بہت اثر پڑتا ہے، آج کے میچ میں کیچز ڈراپ کرنا مہنگا پڑا، اگر ایسا نہ ہوتا تو رزلٹ مختلف ہوتا۔
ان کا کہنا تھا کہ سیریز کا پہلا میچ تھا، ہم بیٹھ کر اس پر بات کریں گے، بابر اعظم ہمارا ٹاپ پلیئر ہے اور دنیا کے بہترین بیٹرز میں سے ایک ہے۔
عمر گل نے کہا کہ بابراعظم آؤٹ آف فارم نہیں تھے، بعض اوقات قسمت ساتھ نہیں دیتی، ٹاپ بیٹرز سے بڑی اننگز کی توقع کررہےتھے جو بدقسمتی سے نہیں ہو پارہی تھی۔
