فرمان الہی
نماز کے اوقات
خیام الپاک ظفر محمّد خان ظفر
یُوں نہ آلودہ ہوا تھی پہلے
یُوں نہ زہریلی فضا تھی پہلے
چِمنیاں یُوں نہ اُگلتی تھیں دھواں
زندگی بخش ہوا تھی پہلے
اَب ہے ماحول میں بارُود کی بُو
کیسی گُل رنگ فضا تھی پہلے
پتّے پتّے میں چمن زاروں کے
پھیلی خوشبوئے وفا تھی پہلے
جگمگاتے تھے ستارے سرِشام
زیست مہتابِ وفا تھی پہلے
پھول بھی شعلہ فشاں ہیں اَب تو
دھول بھی خاکِ شفا تھی پہلے
زندگی دستِ اَجل ہے اَب تو
زندگی حرفِ دُعا تھی پہلے
زندگی تلخ نوا ہے اَب تو
زندگی بانگِ درا تھی پہلے
خاک اُڑتی ہے گُلستانوں میں
نغمہ زَن بادِ صبا تھی پہلے
یہ زمیں شعلوں میں لپٹی ہے اَب
یہ زمیں خُلد نُما تھی پہلے
سو طرح بزمِ محبّت میں ظفر
زندگی جلوہ نُما تھی پہلے
