عامر خان اسلام آباد میں اپنی باکسنگ اکیڈمی بند ہونے پر مایوس

پاکستانی نژاد برطانوی باکسر اور سابق عالمی چیمپئن عامر خان نے اسلام آباد میں اپنی باکسنگ اکیڈمی کے بند ہونے پر مایوسی کا اظہار کیا ہے۔ 

برطانیہ کے اس کم عمر ترین اولمپک میڈلسٹ نے ایک ویڈیو بھی سوشل میڈیا پر شیئر کی جس میں انہوں نے اپنے تحفظات کا بھی اظہار کیا۔ 

عامر کا کہنا تھا کہ میں پاکستان آتا رہا ہوں، ابتدا میں یہاں اکیڈمی ہوتی تھی، لیکن اب بچے مجھے پیغامات بھیجتے ہیں کہ "ہم فائٹ نہیں کرسکتے، ہم ٹریننگ کرنا چاہتے ہیں۔"

انہوں نے سوال اٹھایا کہ پاکستان میں باکسنگ کیوں نہیں ہے؟ میں نے حکام اور حکومت سے بات کی لیکن اس سلسلے میں کوئی پیشرفت نہیں ہوئی۔ 

عامر خان کا کہنا تھا کہ "میرا جم نیا تھا اور صاف ستھرا بھی تھا لیکن اسے بند کروادیا گیا۔ ابھی میں پاکستان میں ہوں، کل انگلینڈ روانہ ہو رہا ہوں پر میں بہت مایوس ہوں۔" 

برطانوی باکسر نے کہا کہ میں یہ دیکھ کر پریشان ہوں کہ میں نے جم پر ایک لاکھ ڈالر خرچ کیے اور یہ رقم ضائع ہوگئی۔ 

علم میں رہے کہ عامر خان نے 2016 میں پاکستان اسپورٹس کمپلکس اسلام آباد میں اپنی باکسنگ اکیڈمی کا افتتاح کیا تھا جس کا مقصد پاکستان میں نوجوان باکسرز کی صلاحتیوں کو نکھارنا تھا۔ 

مذکورہ باکسنگ اکیڈمی 2022 میں پاکستان اسپورٹس بورڈ (پی ایس بی) کی جانب سے تزین و آرائش کےلیے خالی کروانے جانے تک فعال رہی تھیں۔