کراچی: بینک کے باہر 50 لاکھ کی ڈکیتی کے ملزم کا پولیس ریمانڈ

کھارادر میں واقع بینک کے باہر سے 50 لاکھ روپے کی ڈکیتی کیس کے گرفتار ملزم کو عدالت میں پیش کردیا گیا۔

جوڈیشل مجسٹریٹ جنوبی کی عدالت نے ملزم سمیر کو 3 روز کے جسمانی ریمانڈ پر پولیس کے حوالے کردیا۔

عدالت نے ساتھ ہی آئندہ سماعت پر تفتیشی افسر سے پیشرفت رپورٹ طلب کرلی۔

تفتیشی افسر نے عدالت کے روبرو بتایا کہ ملزم مدعی مقدمہ غلام محی الدین کے پاس کام کرتا تھا۔ مدعی نے ملزم کو 50 لاکھ روپے بینک میں جمع کروانےکے لیے دیے۔

تفتیشی افسر نے مزید کہا کہ ملزم نے ساتھیوں کے ساتھ مل کر ڈکیتی کا ڈرامہ رچایا، چھینے گئے 50 لاکھ روپے بھی ملزم سے برآمد کرنے ہیں۔

پولیس حکام کے مطابق واقعے کا مقدمہ تھانہ کھارادر میں درج ہے۔