فرمان الہی
نماز کے اوقات
کراچی (اسٹاف رپورٹر) ٹی 20 ورلڈ کپ سے قبل پاکستانی ٹیم کا ایک اور مشکل امتحان دفاعی چیمپئن انگلینڈ کے خلاف بدھ کو ہیڈنگلے میں ہوگا۔ ٹی ٹوئنٹی ورلڈ کپ 2022 کی فائنلسٹ ٹیمیں پہلے ٹی 20 کیلئے ہیڈنگلے لیڈز میں مدمقابل ہونگی۔ جمعرات کو ورلڈکپ کیلئے پاکستانی ٹیم کا اعلان کیا جائے گا۔یہ پاکستان کیلئے ورلڈکپ سے قبل ہتھیار اور حربے جانچنے کا موقع ہے۔ لیڈز میں بارش کی پیش گوئی ہے اور میچ متاثر ہوسکتا ہے۔ میچ رات ساڑھے دس بجے شروع ہوگا۔ توقع ہے کہ حارث رؤف مکمل فٹ ہوکر تین ماہ بعد پہلی بار میچ کھیلیں گے۔ پاکستان کرکٹ ٹیم کے کپتان بابراعظم نے لیڈز میں پریس کانفرنس میں کہا کہ میں نے ون ڈاؤن پوزیشن پر کھیلنے کا فیصلہ کیا ہے، سیریز ورلڈکپ سے پہلے تیاری کا سنہری موقع ہے ، سیریز جیت کر ورلڈکپ کیلئے اعتماد حاصل کریں گے۔ انگلینڈ دنیا کی بہترین ٹیموں میں سے ایک ہے، انگلینڈ کی بیٹنگ لائن اپ بولنگ سے زیادہ خطرناک ہے۔ حارث رؤف فٹ ہیں ،انہیں کھیلنے کی اجازت مل گئی ہے۔ بقیہ تین میچ 25مئی کو ایجبسٹن برمنگھم، 28 مئی کو کارڈف اور 30 مئی کو اوول لندن میں ہوں گے۔ سیریز کے بعد دونوں ٹیمیں امریکہ اور ویسٹ انڈیز میں ہونے والے آئی سی سی مینز ٹی ٹوئنٹی ورلڈ کپ کیلئے روانہ ہوں گی۔ پاکستان اور انگلینڈ کے درمیان آخری ٹی ٹوئنٹی انٹرنیشنل میلبرن میں آئی سی سی مینز ٹی ٹوئنٹی ورلڈ کپ 2022 کا فائنل تھا ۔ جس میں انگلینڈ نے پانچ وکٹوں سے فتح حاصل کی تھی ۔ گزشتہ ہفتے ڈبلن میں آئرلینڈ کے خلاف سیریز دو ایک سے جیتنے کے بعد پاکستان ٹیم ہیڈنگلے میں مکمل طاقت کے ساتھ میدان میں اترے گی۔ دونوں ٹیموں کے درمیان کھیلے گئے ٹی ٹوئنٹی انٹرنیشنل میچوں میں انگلینڈ نے19 اور پاکستان 9 میچ جیتے ہیں ، ایک میچ نتیجہ خیز ثابت نہیں ہوا ہے۔ دونوں ٹیموں کے درمیان آخری ٹی ٹوئنٹی سیریز انگلینڈ نے چار تین سے اپنے نام کی تھی۔ پاکستان کے کپتان بابر اعظم جو 46 فتوحات کے ساتھ ٹی ٹوئنٹی میں سب سے کامیاب کپتان ہیں، کہتے ہیں مجھے یقین ہے کہ پاکستان آئرلینڈ کی سیریز سے جیت کے مومینٹم کو انگلینڈ کے خلاف بھی برقرار رکھے گا۔ ہیڈنگلے میں اہم ٹریننگ سیشنز کیے ہیں ، ہیڈ کوچ گیری کرسٹن بھی اب اسکواڈ کے ساتھ موجود ہیں ، پوری توجہ سیریز او ر ٹی ٹوئنٹی ورلڈ کپ پر ہے۔ میچ کیلئے پاکستان اسکواڈ بابر اعظم (کپتان)، ابرار احمد، اعظم خان، فخر زمان، حارث رؤف، حسن علی، افتخار احمد، عماد وسیم، محمد عباس آفریدی، محمد عامر، محمد رضوان، محمد عرفان خان، نسیم شاہ، صائم ایوب، سلمان علی آغا، شاداب خان، شاہین شاہ آفریدی اور عثمان خان جبکہ انگلینڈ اسکواڈ جوش بٹلر (کپتان) معین علی جوفرا آرچر، جونی بیرسٹو، ہیری بروک، سیم کرن، بین ڈکٹ، ٹام ہارٹلی، ول جیکس، کرس جارڈن، لیام لیونگ اسٹون، عادل رشید، فل سالٹ، ریز ٹوپلے اور مارک ووڈ پر مشتمل ہوسکتا ہے۔
