ہتک عزت بل پر نظرثانی کی ضرورت ہے، گورنر پنجاب

گورنر پنجاب سردار سلیم خان نے ہتک عزت کا بل پنجاب اسمبلی کو واپس بھجوانے کا اشارہ دے دیا۔

 جیو نیوز کے پروگرام کیپیٹل ٹاک میں بات کرتے ہوئے گورنر سلیم خان نے کہا ہتک عزت قانون کو میں نے ابھی تک پڑھا نہیں، بل کو پڑھنے کے بعد اپنی قانونی ٹیم کو دوں گا وہ بھی اسے دیکھیں گے۔

 گورنر پنجاب نے کہا کہ پنجاب اسمبلی کے ہتک عزت بل پر نظرثانی کی ضرورت ہے، یہ بل حرف آخر نہیں ہے، اس میں جلدی نہیں کرنی چاہیے تھی، مشاورت سے لایا جاتا تو اچھا ہوتا، پنجاب حکومت اسے دوبارہ دیکھ کر قابل اعتراض باتيں نکالے۔

سردار سلیم حیدر خان نے یہ بھی کہا کہ ہتک عزت بل کی وجہ سے ملک میں طوفان برپا ہے جس کو ختم کرنے کیلئے اگر ان کی ضرورت پڑی تو وہ تمام اسٹیک ہولڈرز کو بٹھا کر مسئلہ حل کروانے کی کوشش کریں گے۔

انہوں نے مزید کہا کہ امید ہے بل پر اتفاق رائے ہو جائے گا اگر نہ ہوا تو اٹھارویں ترمیم کے تحت برداشت کرنا پڑے گا، زرعی پالیسی پر بھی دوبارہ نظر ثانی کی ضرورت ہے۔