انٹرنیشنل اولمپک کمیٹی باکسر ایمان خلیف کے حق میں سامنے آگئی

انٹرنیشنل اولمپک کمیٹی نے باکسر ایمان خلیف کے حق میں بیان دیتے ہوئے معطل انٹرنیشنل باکسنگ ایسوسی ایشن پر بھی تنقید کی ہے۔

آئی او سی نے اپنے بیان میں کہا ہے کہ ایمان خلیف سمیت دو باکسرز کو بغیر کسی طریقہ کار کے معطل کردیا گیا تھا، گزشتہ برس ایمان خلیف اور لین یو ٹنگ کو اچانک اور من مانی کے تحت خواتین باکسنگ سے باہر کیا گیا۔

آئی او سی کے مطابق انٹرنیشنل باکسنگ ایسوسی ایشن کے اجلاس کے منٹس میں بھی یہ واضح ہے کہ کوئی طریقہ کار نہیں تھا، اس میٹنگ میں دو باکسرز کو ورلڈ چیمپئن شپ سے باہر کرنے کا فیصلہ دو عہدیداران کا اپنا تھا۔

آئی او سی کے مطابق گمراہ کن رپورٹس کی بنیاد پر اولمپکس میں شریک دو باکسرز کو تنقید کا نشانہ بنایا جارہا ہے، خواتین باکسنگ میں شریک تمام باکسر شرکت کی اہلیت کے معیار پر پورا اترتی ہیں۔

آئی او سی کا کہنا ہے کہ پیرس اولمپکس میں باکسنگ کے وہی ضوابط نافذ العمل ہیں جو 2021 میں تھے، ان ہی تمام قوانین کے تحت اولمپک باکسنگ کے تمام کوالیفائنگ راؤنڈ منعقد کئے گئے ہیں۔

واضح رہے کہ انٹرنیشنل اولمپک کمیٹی نے 2019 میں انٹرنیشنل باکسنگ ایسوسی ایشن کو معطل اور 2023 میں برطرف کیا تھا۔

واضح رہے کہ پیرس اولمپکس کے وویمن باکسنگ ایونٹ میں اٹلی کی اینجلا کیرنی نے الجیریا کی باکسر ایمان خلیف کے خلاف پہلے راؤنڈ کے صرف 46 سیکنڈز کے بعد ہی لڑنے سے انکار کردیا تھا۔

اینجلا کیرنی کا کہنا ہے کہ یہ نا انصافی ہے کیوں کہ اُن کے خیال میں الجیرین حریف خاتون باکسر کے معیار پر پورا نہیں اُترتیں۔