-
فرمان الہی
-
نماز کے اوقات
- منگل30؍محرم الحرام 1446ھ 6؍اگست 2024ء
- بانی: میرخلیل الرحمٰن
- گروپ چیف ایگزیکٹووایڈیٹرانچیف: میر شکیل الرحمٰن
فرمان الہی
نماز کے اوقات
پاکستان شوبز انڈسٹری سے وابستہ معروف اداکارہ روبینہ اشرف نے متنازع ویب سیریز ’برزخ‘ کی حمایت کر دی۔
حال ہی میں اداکارہ روبینہ اشرف نے نجی ٹی وی چینل کے پروگرام میں بطور مہمان شرکت کی اور مختلف امور پر اپنے خیالات کا اظہار کھل کر کیا۔
انہوں نے دوران پروگرام گفتگو کرتے ہوئے ساتھی فنکار فواد خان اور صنم سعید کی متنازع ویب سیریز ’برزخ‘ کی حمایت میں آواز بلند کی اور اس کی کہانی کو منفرد قرار دیا۔
انہوں نے کہا کہ اگر اس سیریز میں ہم جنس پرستی کو دکھایا گیاہے تو یہ اسے فروغ دینے کے لیے نہیں بلکہ آگاہ کرنے کے لیے دکھایا گیا ہے کہ ایسا معاشرے میں ہو رہا ہے اور یہ آج کل کا مسئلہ نہیں بلکہ گزشتہ کئی عرصے سے ہمارے معاشرے میں ہم جنس پرستی اور بچوں کا استحصال ہو رہا ہے۔ آپ کے بات نہ کرنے سے یہ چیز رُکے گی نہیں بلکہ مزید فروغ پائے گی۔
سینیئر اداکارہ کے مطابق اگر اس چیز کو معاشرے سے ختم کرنا ہے تو اس پر بات ہونی چاہئے جیسا کہ اس سے قبل معاشرے کی مختلف مسائل پر ڈرامے بنے ان کے خلاف آواز بلند کی تو اس پر بھی ہونی چاہیے۔
روبیہ اشرف کے مطابق اس سے قبل بھی بولڈ اور خطرناک کہانیوں کو ڈراموں کے ذریعے پیش کیا جا چکا ہے جیسے کہ ڈرامہ سیریل اڈاری اور مائی ری کی کہانی برزخ سے زیادہ بولڈ تھی۔
ان کے مطابق اگر ہم معاشرے کے مسائل ڈراموں کے ذریعے پیش کرتے ہیں تو یہ یہ عوام کو شعور دیتے ہیں اور برائی کی نشاندہی کرتے ہیں تا کہ اسے ٹھیک کیا جا سکے۔
واضح رہے کہ پاکستانی ہدایت کار عاصم عباسی اور پاکستانی کاسٹ پر مبنی ویب سیریز برزخ میں دو ہم جنس پرست مرد کرداروں کو دکھایا گیا ہے جس پر پاکستانی شائقین کی جانب سے غصے کا اظہار کیا جا رہا ہے۔
ویب سیریز کو بھارتی اسٹریمنگ ویب سائٹ زی فائیو کے لیے بنایا گیا ہے اور اسے زی زندگی کے یوٹیوب چینل پر بھی ریلیز کیا جا رہا ہے۔ اب تک سیریز کی پانچ قسطیں نشر کی جا چکی ہیں۔
