آئی پی پیز کو بند کرنا ممکن نہیں، مفتاح اسماعیل

سابق وفاقی وزیر اور عوام پاکستان پارٹی (اے پی پی) کے رہنما مفتاح اسماعیل نے کہا ہے کہ انڈیپنڈنٹ پاور پروڈیوسرز (آئی پی پیز) کو بند کرنا ممکن نہیں۔

کراچی میں تقریب سے خطاب میں مفتاح اسماعیل نے مطالبہ کیا کہ آئی پی پیز معاہدے عوام کے سامنے رکھے جائیں اور گھریلو صارفین کےلیے بجلی بلوں میں 24 فیصد ٹیکس ختم کیا جائے۔

انہوں نے کہا کہ پاکستان میں ایسا نظام لانا چاہتے ہیں جو عوام کےلیے ہو تاکہ ملک چل سکے، مسئلہ قومیت نہیں بلکہ صرف غربت ہے۔

مفتاح اسماعیل نے مزید کہا کہ قانون کی عملداری چاہتے ہیں تاکہ سب ایک قانون کے ساتھ چلیں، بلوچستان اور خیبر پختونخوا کے حالات کی ذمہ دار ریاست ہے۔

ان کا کہنا تھا کہ حکومت کو سرکاری زمین غریب ہاریوں کو دے دینی چاہیے، کچی آبادیوں کو ریگولیٹ کریں تاکہ مکان میسر آسکیں۔