بلوچستان میں دہشتگردی، چین اور ایران کی سخت الفاظ میں مذمت

قلات اور موسیٰ خیل میں ہونے والے دہشت گردی کے واقعات پر چین اور ایران کی جانب سے سخت الفاظ میں مذمت کی گئی ہے۔

چینی وزارتِ خارجہ کی جانب سے جاری کیے گئے بیان میں کہا گیا ہے کہ پاکستان میں دہشت گرد حملوں کی شدید مذمت کرتے ہیں۔

چین کی وزارتِ خارجہ نے کہا ہے کہ دہشت گردی کے خلاف کارروائیوں میں پاکستان کی بھرپور حمایت جاری رکھیں گے۔

حالیہ دہشتگردی میں 50 سے زائد شہری شہید ہوئے: وزیرِ اعظم

وزیر اعظم شہباز شریف نے کہا ہے کہ چند دنوں میں دہشت گردی کے اندوہناک واقعات ہوئے، حالیہ دہشت گردی میں 50 سے زائد شہری شہید ہوئے۔

دوسری جانب ایک بیان میں ایرانی سفارت خانے نے کہا ہے کہ بلوچستان میں دہشت گردی کے واقعات کی سخت الفاظ میں مذمت کرتے ہیں۔

ایرانی سفارت خانے کا کہنا ہے کہ یہ حملے موسیٰ خیل اور قلات میں 33 شہریوں اور پولیس اہلکاروں کی شہادت کا باعث بنے، ہم حکومت پاکستان، عوام اور پیاروں کو کھونے والے خاندانوں کے ساتھ دلی تعزیت کرتے ہیں، اللّٰہ تعالیٰ شہداء پر اپنی رحمتیں نازل فرمائے۔