پرویز الہٰی کا نام پاسپورٹ کنٹرول لسٹ سے نکالنے کی درخواست سماعت کیلئے مقرر

30 اگست ، 2024

لاہور ہائی کورٹ نے سابق وزیرِ اعلیٰ پنجاب چوہدری پرویز الہٰی اور دیگر کے نام پاسپورٹ کنٹرول لسٹ سے نکالنے کے لیے دائر درخواست پر سے سماعت کے دوران رجسٹرار آفس کا اعتراض دور کر دیا۔

عدالتِ عالیہ کے جسٹس شمس محمود مرزا نے پرویز الہٰی، راسخ الہٰی اور زارا الہٰی کی درخواستیں سماعت کے لیے مقرر کرنے کا حکم بھی دے دیا۔

لاہور ہائی کورٹ کے رجسٹرار آفس کی جانب سے اعتراض عائد کیا گیا تھا کہ درخواست میں وہی استدعا کی گئی ہے جو اس سے پہلے دائر درخواست میں کی گئی تھی۔

پرویز الہٰی و دیگر کی جانب سے درخواست میں مؤقف اختیار کیا گیا کہ پرویز الہٰی پر درج مقدمات کی عدالتوں سے ضمانتیں منظور ہو چکی ہیں، وہ 20 ستمبر سے 5 اکتوبر تک عمرہ کرنے اور برطانیہ جانا چاہتے ہیں۔

درخواست میں مؤقف اپنایا گیا کہ درخواست گزاروں کے نام پاسپورٹ کنٹرول لسٹ میں ہونے کے باعث بنیادی حقوق کی خلاف ورزی ہو رہی ہے۔

درخواست گزاروں نے استدعا کی ہے کہ عدالت پاسپورٹ کنٹرول لسٹ سے ناموں کو نکالنے کا حکم دے۔

قومی خبریں سے مزید