پاکستانی بچے کی بین الاقوامی مقابلۂ قرأت میں چوتھی پوزیشن

03 ستمبر ، 2024

**محمد بشر ــــ فوٹو بشکریہ ایجنسی اے پی پی**

سوات سے تعلق رکھنے والے 10 سالہ بچے محمد بشر نے الجزائر میں منعقد ہونے والے بین الاقوامی مقابلۂ قرأت میں چوتھی پوزیشن حاصل کر کے ملک کا سر فخر سے بلند کر دیا۔

محمد بشر کی کامیابی نے پاکستان اور الجزائر کے درمیان مضبوط ثقافتی اور روحانی تعلقات کو اجاگر کیا ہے۔

حال ہی میں محمد بشر نے بین الاقوامی مقابلۂ قرأت ’مزامیر داؤد‘ میں حصّہ لیا جس کا اہتمام الجزائر کے نجی میڈیا آؤٹ لیٹ ایکوروک نے کیا تھا۔

یہ مقابلہ 18 سے 31 اگست تک جاری رہا جس میں 15 سے زائد ممالک کے امیدواروں نے شرکت کی۔

محمد بشر نے اس باوقار مقابلے میں چوتھی پوزیشن حاصل کر کے 15 سو ڈالرز کا انعام حاصل کیا۔

ایکوروک ہر سال اس مقابلے کی میزبانی کرتا ہے جس میں دنیا بھر سے نوجوان قاری حسنِ قرأت کا مظاہرہ کرتے ہیں۔

اس تقریب کے علاوہ الجزائر کی وزارتِ مذہبی امور و اوقاف ہر سال الجزائر کے صدر عبدالمجید تبون کی سرپرستی میں بین الاقوامی مقابلۂ حسنِ قرأت کا انعقاد کرتی ہے۔

خاص رپورٹ سے مزید