فرمان الہی
نماز کے اوقات
بھارتی بلے باز روہت شرما نے ون ڈے کرکٹ میں 352 چھکے لگا کر سابق پاکستانی بلے باز شاہد آفریدی کے 351 چھکوں کا طویل عرصے سے قائم ورلڈ ریکارڈ توڑ دیا۔
جنوبی افریقا کے خلاف 3 ون ڈے سیریز کے پہلے میچ میں روہت شرما نے اوپنر کی حیثیت سے 57 رنز کی اننگ کھیلی جس میں 3 چھکے بھی شامل تھے، اس میچ میں انہوں نے اپنی 60 ویں سنچری بھی بنائی۔
3 چھکوں کے ساتھ روہت شرما کے ون ڈے انٹرنیشنل میں چھکوں کی تعداد 352 ہو گئی ہے جو کہ انہوں نے 269 اننگز میں لگائے ہیں۔
ان سے قبل یہ ریکارڈ پاکستان کے سابق کپتان شاہد آفریدی کے پاس تھا جنہوں نے 369 اننگز میں 351 چھکے لگائے تھے۔
تیسرے نمبر پر ویسٹ انڈیز کے کرس گیل ہیں جنہوں نے 294 اننگز میں 331 چھکے لگا رکھے ہیں۔
ون ڈے کے ساتھ ٹیسٹ اور ٹی ٹوئنٹی انٹرنیشنل کے مجموعی چھکوں کی بات کی جائے تو اس فہرست میں روہت شرما پہلے سے ہی نمبر ون پوزیشن پر موجود ہیں۔
38 سالہ روہت شرما نے انٹرنیشنل کرکٹ میں مجموعی طور پر 645 چھکے لگائے ہیں۔
اس فہرست میں روہت شرما کے بعد کرس گیل موجود ہیں جنہوں نے 553 چھکے لگائے ہیں۔
یہاں پر شاہد آفریدی 476 چھکوں کے ساتھ تیسری پوزیشن پر براجمان ہیں۔
اسی میچ میں بھارتی کرکٹ ٹیم کے اسٹار بیٹر ویرات کوہلی نے جارحانہ انداز میں 135 رنز کے ساتھ اپنے کیریئر کی 52 ویں سنچری بنا کر ریکارڈ قائم کر دیا اور سچن ٹنڈولکر کو پیچھے چھوڑ دیا۔
جنوبی افریقا کے خلاف ویرات کوہلی نے 120 گیندوں پر 135 رنز بنائے، میچ میں انہوں نے روہت شرما کے ساتھ 136 رنز کی شراکت بھی قائم کی، جس کی بدولت بھارت کا اسکور 349 تک پہنچا۔
