ایم ڈی کیٹ میں بلیوٹوتھ استعمال کرنے کی کوشش، کرک میں ہاسٹل سے 8 افراد زیرحراست، مقدمہ درج

ایم ڈی کیٹ میں مبینہ طور پر بلیوٹوتھ استعمال کرنے کی کوشش کی گئی۔ پشاور سے ذرائع کے مطابق کرک میں نجی ہاسٹل سے 8 افراد حراست میں لیے گئے ہیں، جن کے خلاف مقدمات بھی درج کرلیے گئے ہیں۔ 

ذرائع کے مطابق ملزمان کرک سے بلوچستان میں ایم ڈی کیٹ ٹیسٹ بلیوٹوتھ کے ذریعے حل کروانے کی کوشش کر رہے تھے۔ 

ذرائع نے بتایا کہ ملزمان نے امیدواروں کو بلوچستان میں رجسٹرڈ ہونے کا کہا تھا۔ کرک کے رہائشیوں نے ایم ڈی کیٹ کےلیے خود کو بلوچستان میں رجسٹرڈ کروایا۔ کے پی میں سیکیورٹی بڑھانے اور بہتر انتظامات کے باعث یہاں ٹیسٹ آؤٹ نہیں کرسکتے تھے۔ 

کوئٹہ: ایم ڈی کیٹ ٹیسٹ، 50 سے زائد طلبا زیرحراست، نقل کے آلات برآمد

وائس چانسلر بولان میڈیکل یونیورسٹی ڈاکٹر شبیر لہڑی نے کہا کہ میڈیکل کالجز میں داخلوں کے لیے ہونے والے ایم ڈی کیٹ ٹیسٹ کے دوران 50 سےزائد طلبہ کو حراست میں لیا گیا ہے۔

ذرائع کے مطابق ملزمان کا تعلق مبینہ طور پر گزشتہ ایم ڈی کیٹ ٹیسٹ آؤٹ کرنے والے گینگ سے ہے۔ سیکیورٹی اداروں نے جدید ٹیکنالوجی کی مدد سے پہلے سے ملزمان کا پتہ لگایا تھا۔ 

ذرائع نے بتایا کہ ملزمان اور امیدواروں سے خفیہ بلیوٹوتھ ڈیوائسز برآمد ہوئیں۔

پولیس کا کہنا ہے کہ ایم ڈی کیٹ ٹیسٹ پیپر لیک اور بلیوٹوتھ کے استعمال پر گرفتار 8 افراد کے خلاف مقدمہ درج کرلیا گیا ہے۔ 

پولیس نے بتایا کہ خفیہ ادارے کی اطلاع پر نجی ہاسٹل سے 8 افراد گرفتار کیے تھے۔

خیال رہے کہ گزشتہ سال خیبر پختونخوا میں ایم ڈی کیٹ ٹیسٹ بلیوٹوتھ اسکینڈل کے باعث دوبارہ منعقد کروایا گیا تھا۔ ایم ڈی کیٹ بلیوٹوتھ اسکینڈل میں کرک سے ظفر گینگ کے افراد گرفتار ہوئے تھے۔