ایم ڈی کیٹ کا پرچہ لیک پرچے سے مشابہت رکھتا ہے، چیئرمین ینگ ڈاکٹرز ایسوسی ایشن

ینگ ڈاکٹرز ایسوسی ایشن (وائے ڈی اے) نے میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) کے پرچے پر ردعمل دے دیا۔

کراچی سے جاری بیان میں چیئرمین وائے ڈی اے ڈاکٹر محبوب نے کہا کہ ایم ڈی کیٹ کا پرچہ سوشل میڈیا پر لیک پرچے سے مشابہت رکھتا ہے۔

انہوں نے کہا کہ پرچہ گزشتہ رات سے سوشل میڈیا پر وائرل تھا، امیدواروں کے زیادہ تر سوالات لیک پیپر سے ملتے تھے۔

ایم ڈی کیٹ میں بلیوٹوتھ استعمال کرنے کی کوشش، کرک میں ہاسٹل سے 8 افراد زیرحراست، مقدمہ درج

ایم ڈی کیٹ میں مبینہ طور پر بلو ٹوتھ استعمال کرنے کی کوشش کی گئی۔ پشاور سے ذرائع کے مطابق کرک میں نجی ہاسٹل سے 8 افراد حراست میں لیے گئے ہیں۔

ڈاکٹر محبوب نے کہا کہ ایم ڈی کیٹ کے پیپر کے 3 سے 4 کوڈ بنتے ہیں، سوالات کی ترتیب آگے پیچھے ہوسکتی ہے، مگر ٹیسٹ پیپر کے سوالات متعدد لیک پیپر جیسے ہی تھے۔

ان کا کہنا تھا کہ ایم ڈی کیٹ پرچہ کل 186 سوالات پر مشتمل ہوتا ہے، ہر سال پرچہ لیک ہونے سے طلبہ کا تعلیمی سال دیر سے شروع ہوتا ہے۔

چیئرمین وائے ڈی اے نے مزید کہا کہ گزشتہ سال بھی جے پی ایم سی کے تحت لیا گیا پرچہ لیک ہوا تھا، ڈاؤ اسپتال کے زیر انتظام پرچہ دوبارہ ہوا، وہ بھی لیک ہوا۔

کوئٹہ: ایم ڈی کیٹ ٹیسٹ، 50 سے زائد طلبا زیرحراست، نقل کے آلات برآمد

وائس چانسلر بولان میڈیکل یونیورسٹی ڈاکٹر شبیر لہڑی نے کہا کہ میڈیکل کالجز میں داخلوں کے لیے ہونے والے ایم ڈی کیٹ ٹیسٹ کے دوران 50 سےزائد طلبہ کو حراست میں لیا گیا ہے۔

اس معاملے پر ترجمان ڈاؤ یونیورسٹی نے کہا کہ ایم ڈی کیٹ کا سال 2024ء کا پرچہ پُرامن طریقے سے کراچی میں ہوا۔

پاکستان میڈیکل اینڈ ڈینٹل کونسل (پی ایم ڈی سی) حکام نے پرچہ لیک ہونے کی تردید کی اور کہا کہ پیپر بنانے اور منعقد کرانے کی ذمے داری ڈاؤ یونیورسٹی کی ہے، لیک ہونے والے پیپر کے سوالات کا امتحانی پرچے سے ملنا اتفاق ہوسکتا ہے۔