لانگ مارچ توڑ پھوڑ کیس، علی امین گنڈاپور کو اشتہاری قرار دینے کی کارروائی شروع

اسلام آباد کی انسدادِ دہشت گردی کی عدالت نے لانگ مارچ توڑ پھوڑ کیس میں وزیرِ اعلیٰ خیبر پختون خوا علی امین گنڈاپور کو اشتہاری قرار دینے کی کارروائی شروع کر دی۔

تحریکِ انصاف کے رہنماؤں کے خلاف لانگ مارچ توڑ پھوڑ کیس کی سماعت جج طاہر عباس سپرا نے کی۔

سماعت کے دوران پی ٹی آئی کے وکلاء سردار مصروف و دیگر عدالت میں پیش ہوئے۔

عدالت نے وزیرِ اعلیٰ خیبر پختون خوا علی امین کو اشتہاری قرار دینے کی کارروائی شروع کر دی۔

سیشن کورٹ اسلام آباد: علی امین کو 23 اکتوبر تک گرفتار کرکے پیش کرنے کا حکم

عدالت طلبی کے باوجود وزیراعلیٰ علی امین گنڈاپور آج بھی عدالت پیش نہیں ہوئے۔ علی امین گنڈاپور کی عدم پیشی پر عدالت نے ناقابل ضمانت وارنٹ گرفتاری برقرار رکھے ہیں۔

عدالت نے فیصل جاوید کی جانب سے حاضری سے استثنیٰ کی درخواست منظور کر لی۔

اسلام آباد کی انسدادِ دہشت گردی کی عدالت نے کیس کی سماعت 21 نومبر تک ملتوی کر دی۔

واضح رہے کہ علی امین گنڈاپور کی مسلسل عدم پیشی پر عدالت نے ناقابل ضمانت وارنٹِ گرفتاری جاری کر رکھے ہیں۔