فرمان الہی
نماز کے اوقات
لندن (پی اے) میٹروپولیٹن پولیس کے مطابق جنوب مشرقی لندن میں فائرنگ سے ایک شخص ہلاک، 2 شدید زخمی ہوگئے۔ پولیس کے مطابق فائرنگ کا واقعہ سیڈنہیم میں ویلز پارک روڈ کے قریب اتوار کو صبح 10:10 بجے کے قریب پیش آیا، پولیس جب موقع پر پہنچی تو ایک شخص زخمی حالت میں موجود تھا جو بعد میں زخموں کی تاب نہ لاتے ہوئے چل بسا، ایک خاتون نے، جو پیروں پر گولی لگنے کی وجہ سے زخمی ہوگئی تھی، کو ہسپتال پہنچایا، اس کی حالت خطرے سے باہر بتائی جاتی ہے۔ ایک تیسرا زخمی بھی ہسپتال پہنچا، جو گولی لگنے کی وجہ سے زخمی ہوا تھا، تاہم اس کی حالت کے بارے میں کوئی اطلاع نہیں ملی۔ میٹ نے تشدد کے واقعے کی مذمت کرتے ہوئے لوگوں سے کہا ہے کہ اگر کسی کو ان کے بارے میں کوئی معلومات ہوں تو وہ پولیس سے رابطہ کریں۔ ابھی تک کسی کو گرفتار نہیں کیا جاسکا۔ پولیس فائرنگ سے ہلاک اور زخمی ہونے والے متاثرین کی شناخت کا پتہ چلانے اور ان کی فیملی سے رابطے کی کوشش کررہی ہے۔ میٹ کے ترجمان نے بتایا کہ پوسٹ مارٹم مناسب وقت پر کیا جائے گا۔ کمانڈر پیٹر اسٹیونس نے بتایا کہ میں جانتا ہوں کہ اتوار کی صبح ایک رہائشی علاقے میں تشدد کے اس واقعے سے لوگ خوفزدہ ہوگئے ہوں گے، میں ان لوگوں کی تشویش سے آگاہ ہوں اور لوگوں کو یقین دلاتا ہوں کہ میٹ پولیس اپنے پارٹنرز کے ساتھ واقعے کے اسباب معلوم کرنے اور اس میں ملوث لوگوں کو انصاف کے کٹہرے میں لانے کیلئے تیزی سے کارروائی کررہی ہے۔ انھوں نے کہا کہ جائے وقوعہ کی فارنزک کرائی جائے گی اور علاقے میں پولیس کے گشت میں اضافہ کردیا جائے گا۔ انھوں نے کہا کہ اگر کسی کو اس بارے میں کچھ معلوم ہو تو پولیس سے رابطہ کرے۔ انھوں نے کہا کہ بہت سے لوگ اس حوالے سے پہلے ہی ہم سے رابطے میں ہیں، ہم ان لوگوں سے تعاون کے متمنی ہیں، جن کے پاس فون، سی سی ٹی وی فوٹیج یا ڈوربیل کی ایسی فوٹیج ہوں، جن سے تفتیش میں مدد مل سکے۔
