فرمان الہی
نماز کے اوقات
بھارت کے مشہور ٹی وی شو ’کرائم پٹرول‘ کے اداکار راگھو تیواری پر ایک شخص نے چھری اور لوہے کے ڈنڈے سے حملہ کردیا۔
بھارتی میڈیا کے مطابق 30 دسمبر کو اداکار ممبئی میں سڑک پار کرتے ہوئے ایک موٹرسائیکل سوار سے ٹکرا گئے تھے۔
راگھو تیواری کے مطابق وہ اپنے دوست کی گاڑی سے اتر کر سڑک عبور کر رہے تھے کہ اس دوران وہ موٹرسائیکل سوار سے ٹکرا گئے، جس کے فوری بعد انہوں نے اس شخص سے معافی مانگی لیکن ملزم نے گالی دینا شروع کردی۔
اداکار نے اس واقعے سے متعلق بتایا کہ میں نے اُس شخص سے پوچھا کہ وہ مجھے کیوں گالی دے رہا ہے جس کے بعد وہ شخص غصے میں اپنی موٹرسائیکل سے نیچے اترا اور مجھ پر 2 مرتبہ چھری سے حملہ کیا پھر اس نے مجھے پیٹ میں لات ماری جس کی وجہ سے میں زمین پر گر گیا۔
راگھو تیواری نے کہا کہ ملزم نے شراب کی بوتل اور موٹرسائیکل سے لوہے کی روڈ بھی مجھے مارنے کے لیے نکالی۔
انہوں نے کہا کہ ملزم نے مجھے تھپڑ بھی مارا جس کے بعد میں نے اپنے دفاع میں لکڑی کا ایک ٹکڑا اٹھا کر اُس شخص کے ہاتھ پر مارا جس سے بوتل اُس کے ہاتھ سے گر گئی، اُس شخص نے مزید غصے میں لوہے کی روڈ سے میرے سر پر 2 بار حملہ کیا۔
راگھو تیواری کے مطابق اس واقعے کے بعد ملزم وہاں سے فرار ہوگیا جس کے بعد ان کے دوست علاج کے لیے انہیں اسپتال لے گئے۔
اداکار نے پولیس پر ان کی شکایت نہ سننے کا الزام عائد کیا ہے۔
راگھو تیواری کے مطابق پولیس نے کچھ سی سی ٹی وی ویڈیوز جمع کی ہیں تاہم کسی شخص کو گرفتار نہیں کیا گیا ہے۔
