فرمان الہی
نماز کے اوقات
سہ ملکی سیریز کے دوسرے میچ میں جنوبی افریقا کا 304 رنز کا ہدف نیوزی لینڈ نے 8 گیندوں قبل آسانی سے حاصل کرلیا، اسکے ساتھ ہی کیویز نے سیریز کے فائنل میں اپنی جگہ پکی کرلی۔
قذافی اسٹیڈیم لاہور میں کھیلے گئے میچ میں نیوزی لینڈ نے 4 وکٹ پر 48 اعشاریہ 4 اوورز میں 308 رنز بنا کر میچ 6 وکٹ سے اپنے نام کیا۔
سہ فریقی سیریز میں نیوزی لینڈ کی یہ لگاتار دوسری فتح ہے، جس کے ساتھ وہ فائنل میں پہنچ گئی جبکہ دوسری فائنلسٹ ٹیم کا فیصلہ 12 فروری کو پاکستان اور جنوبی افریقا کے میچ کے بعد ہوگا۔
دوسری اننگز کی خاص بات کین ولیم سن کی سنچری ہے، جنہوں نے ناقابل شکست رہتے ہوئے 133 رنز کی ناقابلِ شکست باری کھیلی۔ دوسرے کھلاڑیوں میں ڈیوان کانوے 97، مچل 10، لیتھم صفر اور ینگ 19 رنز بنا کر پویلین لوٹ گئے۔
اس سے قبل جنوبی افریقہ نے مقررہ 50 اوورز میں 6 وکٹ پر 304 رنز بنائے تھے، بیٹر میتھیو بریٹز نے ڈیبیو پر سنچری اسکور کی، انہوں نے 150رنز کی اننگز کھیلی۔
میتھیو بریٹز ڈیبیو پر 150رنز بنانے والے پہلے بلے باز بھی بن گئے ہیں۔
جنوبی افریقا کی جانب سے ویان ملڈر نے 64 اور جیسن اسمتھ نے 41 رنز بنائے۔
نیوزی لینڈ کی طرف سے میٹ ہینری اور ول او رورکی نے 2، 2 وکٹیں حاصل کیں۔
واضح رہے کہ سہ فریقی سیریز کے دوسرے میچ میں نیوزی لینڈ نے جنوبی افریقہ کے خلاف ٹاس جیت کر پہلے بولنگ کا فیصلہ کیا۔
ٹاس کے موقع پر گفتگو کرتے ہوئے نیوزی لینڈ کے کپتان مچل سینٹنر کا کہنا تھا کہ ٹیم میں ایک تبدیلی کی ہے، راچن رویندرا کی جگہ کونوے کو شامل کیا ہے۔
اس موقع پر گفتگو کرتے ہوئے جنوبی افریقا کے کپتان ٹیمبا باووما نے کہا کہ اگر ہم ٹاس جیتتے تو پہلے فیلڈنگ ہی کرتے۔
انہوں نے کہا کہ ٹیم میں نئے کھلاڑی ہیں اور وہ سب کھیلنے کےلیے پرجوش ہیں۔
واضح رہے کہ 3 ملکی سیریز کے پہلے میچ میں نیوزی لینڈ نے پاکستان کو 78 رنز سے شکست دی تھی۔
نیوزی لینڈ نے پہلے بیٹنگ کرتے ہوئے پاکستان کو 331 رنز کا ہدف دیا تھا، قومی ٹیم 252 رنز بنا کر آؤٹ ہو گئی تھی۔
