فرمان الہی
نماز کے اوقات
آئی سی سی چیمپئنز ٹرافی کے لیے نیشنل اسٹیڈیم کراچی کا افتتاح کل ہو گا، رنگارنگ افتتاحی تقریب میں آتش بازی کا شاندار مظاہرہ کیا جائے گا، لائٹس شو کا بھی اہتمام ہو گا، تقریب میں عوام کا داخلہ مفت ہو گا۔
چیئرمین پاکستان کرکٹ بورڈ محسن نقوی کا اس حوالے سے کہنا ہے کہ نیشنل اسٹیڈیم کراچی میں شائقین اور کھلاڑیوں کے لیے عالمی معیار کی سہولتیں دی ہیں۔
انہوں نے کہا ہے کہ چیمپئنز ٹرافی کی ٹیمز کے کھلاڑیوں کو بہترین سہولتیں فراہم کریں گے، نیشنل اسٹیڈیم کراچی میں پویلین کی عمارت کو دوبارہ تعمیر کیا گیا ہے۔
محسن نقوی نے کہا کہ تمام ہاسپٹیلیٹی باکسز کی تزین و آرائش کر دی گئی ہے، ہر انکلوژر میں نئی کرسیاں، ایل ای ڈی لائٹس، جدید اسکرینز لگائی گئی ہیں، شائقین کے بہتر نظارے کے لیے جنگلےختم کر دیے گئے ہیں۔
انہوں نے کہا ہے کہ نیشنل اسٹیڈیم کراچی کا تعمیراتی کام 28 ستمبر کو شروع ہوا تھا جو 31 جنوری کو مکمل کر لیا گیا ہے۔
محسن نقوی نے نیشنل اسٹیڈیم کراچی کا تعمیراتی کام کرنے والے مزدوروں کی محنت کو سراہتے ہوئے کہا کہ ایف ڈبلیو او، نیسپاک، کنٹریکٹر اور پی سی بی کی پوری ٹیم نے انتھک محنت سے کام کیا ہے۔
