فرمان الہی
نماز کے اوقات
امیرِ جماعت اسلامی حافظ نعیم الرحمٰن کا کہنا ہے کہ ٹرمپ کو اتنا ہی شوق ہے تو اسرائیل کو نیو یارک یا واشنگٹن کے اردگرد بسائیں۔
لاہور منصورہ میں پریس کانفرنس کرتے ہوئے انہوں نے کہا کہ اس وقت دنیا کا سب سے بڑا مسئلہ فلسطین ہے، فلسطین کے مسئلہ پر امریکی صدر ٹرمپ غیر سنجیدگی کا مظاہرہ کر رہے ہیں۔
حافظ نعیم الرحمٰن کا کہنا ہے کہ رپورٹس کے مطابق اسرائیلی فوج نے فلسطینی بچوں کو بھی اسنائپرز سے قتل کیا، اسرائیل نے جو کچھ بھی فلسطین میں کیا ہے اس کے پیچھے امریکا ہے۔
امیرِ جماعت اسلامی نے کہا کہ حماس کو خراج تحسین پیش کرتے ہیں جس نے اسرائیل اور امریکا کے سامنے مزاحمت کی، جو نقصان فلسطین کا ہوا ہے تاوان کی صورت میں امریکا اور اسرائیل کو ادا کرنا چاہیے۔
ان کا کہنا ہے کہ جب سے یہودی آباد کاری کا سلسلہ شروع ہوا دنیا کا امن تباہ ہوا ہے، افسوس ہمارا حکمران طبقہ معیشت کی بات کر کے ملکی وقار کو بھی مدِ نظر نہیں رکھتا۔
انہوں نے کہا کہ وفاق اور پنجاب کے حکمران اشتہاروں میں کہتے نظر آتے ہیں مہنگائی کم ہوئی ہے، مہنگائی کہاں کم ہوئی ہے چینی 120 سے 160 روپے کلو ہو گئی ہے، گندم کا بحران ہے گندم کی قیمت کا اعلان نہیں ہوا۔
حافظ نعیم الرحمٰن کا مزید کہنا ہے کہ شہباز شریف صاحب، قیمتیں بڑھنے سے مہنگائی کم نہیں ہوتی، ہمارا مطالبہ ہے فوری طور پر بجلی کی قیمت کم کریں، آئی ایم ایف کیا کر لے گا، تنخواہ داروں کے ٹیکسز میں کمی نہیں کر رہے، یہ جھوٹے اعداد و شمار دیتے ہیں۔
امیرِ جماعت اسلامی نے یہ بھی کہا کہ 25 ہزار لوگ ایسے ہیں جو اپنا سرمایہ باہر منتقل کرنا چاہتے ہیں، کراچی کے لوگوں کی بنیادی ضروریات کا خیال نہیں رکھتے، 16 سال میں صرف 300 بسز دی ہیں، شہر کراچی کے ساتھ ان لوگوں نے کیا سلوک کیا ہے، شہر کراچی کے لوگوں کو ریلیف ملنا چاہیے۔
