فرمان الہی
نماز کے اوقات
ایف پی سی سی آئی نے بجٹ 26-2025ء کے لیے ٹیرف تجاویز وزارتِ تجارت کو بھیج دیں۔
چائے کی درآمد پر کسٹم ڈیوٹی 11 فیصد سے کم کر کے 5 فیصد کرنے کی تجویز دی گئی ہے۔
میڈیکل ڈیوائسز اور ادویات سازی کے لیے خام مال کی درآمد پر کسٹم ڈیوٹی میں بھی کمی کا کہا ہے۔
صدر ایف پی سی سی آئی عاطف اکرام کا کہنا ہے کہ کسٹم ڈیوٹی 20 سے کم کر کے 5 فیصد اور 6 فیصد ایڈیشنل کسٹم ڈیوٹی صفر کی جائے، خام مال درآمد پر ڈیوٹی میں کمی سے مقامی سطح پر ادویات کی پروڈکشن میں اضافہ ہو گا۔
بجٹ تجویز میں موٹر سائیکل کے پرزہ جات پر کسٹم ڈیوٹی 35 فیصد سے کم کر کے 20 فیصد کرنے کا کہا گیا ہے۔
عاطف اکرام شیخ نے بجٹ تجاویز دیتے ہوئے کہا ہے کہ اسپیئرز پارٹس کی قیمتوں میں کمی سے حکومتی ریونیو میں اضافہ ہو گا، قومی ٹیرف کے ساتھ اسپیئر پارٹس کی اسمگلنگ روکنے کے لیے بھی اقدامات کیے جائیں۔
صدر ایف پی سی سی آئی کے مطابق کاغذ اور پیپر بورڈ پر کسٹم ڈیوٹی 10 فیصد برقرار رکھ کر ریٹیل ڈیوٹی ختم کی جائے، پرنٹڈ میٹریل کی درآمد پر کسٹم ڈیوٹی 3 فیصد سے بڑھا کر 20 فیصد کی جائے۔
عاطف اکرام شیخ نے کہا ہے کہ 4 ارب پرنٹڈ میٹریل درآمد ہوتا ہے جو مقامی سطح پر پرنٹ ہو سکتا ہے، اقدام سے ناصرف قیمتی زرِمبادلہ بچے گا بلکہ نئی نوکریاں بھی پیدا ہوں گی۔
5 سال پرانی تعمیراتی مشینری کی درآمد پر پابندی ہٹانے اور 10سال پرانی مشینری درآمد کی اجازت دینے کی تجویز بھی دی گئی ہے۔
انہوں نے یہ بھی کہا کہ اس اقدام سے ملک میں تعمیراتی سرگرمیوں میں اضافہ اور منصوبوں کی لاگت میں کمی ہو گی۔
