فرمان الہی
نماز کے اوقات
آسٹریلیا کے کپتان اسٹیو اسمتھ نے کہا ہے کہ سیمی فائنل میں اچھا کھیل پیش کرنے کی کوشش کریں گے، وہ دبئی میں کسی کو چپ کرانے نہیں آئے ہیں۔
آسٹریلین کپتان دبئی کرکٹ اسٹیڈیم میں پریس کانفرنس میں پیش ہوئے تو صحافیوں نے سوالات کی گوگلی بھی کرائی اور بانسر بھی البتہ تجربہ کار اسٹیو اسمتھ نے محتاط اور دوٹوک جوابات دیے۔
انھوں نے مزید کہا کہ بھارت نے دبئی کی کنڈیشنز کو اچھی طرح سمجھتے ہیں کیونکہ سارے میچز وہ دبئی میں کھیل رہے ہیں۔
اسٹیو اسمتھ سے 2023 ورلڈ کپ کے فائنل میں بھارت کو شکست دینے اور شائقین کے مکمل خاموش کرانے پر جواب دیتے ہوئے کہا کہ وہ کھیل میں بہترین کارکردگی دیکھانے پر یقین رکھتے ہیں، شائقین کو خاموش کرانے پر نہیں۔
انہوں نے کہا کہ بھارت مسلسل دبئی میں کھیل رہی ہے، اچھی کارکردگی دکھا رہی ہے، سیمی فائنل کڑا معرکہ ہوگا جس کا بے صبری سے انتظار ہے۔
بھارت کے ناقابل شکست ریکارڈ اور دبئی کے حالات سے واقفیت کے بارے میں سوال کے جواب میں اسمتھ نے کہا کہ بھارتی ٹیم موجودہ کنڈیشنز کو اچھی طرح سمجھتی ہے، پچ خشک ہے اور اس پر کافی گیمز ہوچکی ہیں، جو اسپنرز کے لیے مددگار ہوگی۔
انہوں نے کہا کہ آسٹریلین ٹیم خوب سے خوب تر کھیلنے کے لیے پرعزم ہیں اور دو اچھی ٹیموں کے درمیان سخت مقابلہ ہوگا۔
بھارتی اسپنرز خاص طور پر ورون چکرورتی کے خطرے سے نمٹنے کے بارے میں کپتان اسمتھ نے کہا کہ چکرورتی سمیت تمام بھارتی اسپنرز اعلیٰ معیار کے ہیں، اس میچ کا نتیجہ اس بات پر منحصر ہوگا کہ ہم مڈل اوورز میں ان کے اسپنرز کو کیسے کھیلتے ہیں، ہمارے پاس مختلف آپشنز ہیں۔
بھارت کے خلاف پاور پلے میں مضبوط آغاز پر آسٹریلین کپتان اسٹیو اسمتھ نے کہا ’ٹریوس ہیڈ جیسے کھلاڑی کا جارحانہ کھیل ہمیں ایک شاندار آغاز دے سکتا ہے، وہ بڑے میچز میں ہمیشہ پرفارم کرتے ہیں اور کل بھی ہم ان سے یہی توقع رکھتے ہیں‘۔
پاکستان میں سخت سیکیورٹی کے دوران کھیلنے کے تجربے پر بات کرتے ہوئے اسمتھ نے کہا کہ پاکستان میں سخت حصار سے نکل کر دبئی میں ری سیٹ اور ٹریننگ کا موقع ملا، جس سے ہمیں کنڈیشنز کے مطابق خود کو ایڈجسٹ کرنے میں مدد ملی۔
انہوں نے کہا کہ دبئی میں کچھ پلئیرز نے گالف کھیلی تو کچھ ریلکس ہوکر ٹریننگ کی ہے۔
