فرمان الہی
نماز کے اوقات
پاکستانی اداکارہ حرا مانی شدید تنقید کی زد میں ہیں، ان کو کرینہ کپور سے خود کا موازنہ کرنا مہنگا پڑ گیا۔
حرا مانی جو اپنی منفرد اداکاری اور دلچسپ شخصیت کے باعث مداحوں میں مقبول ہیں، حال ہی میں ایک انٹرویو کے دوران دیے گئے بیان کے بعد ان کو شدید تنقید کا سامنا ہے۔
ایک انٹرویو کے دوران جب ان سے پوچھا گیا کہ کیا وہ بالی ووڈ فلم جب وی میٹ میں گیت (کرینہ کپور کا کردار) ادا کر سکتی تھیں تو حرا مانی نے ناصرف اس سے اتفاق کیا بلکہ دعویٰ کیا کہ یہ کردار میری حقیقی زندگی سے متاثر ہو کر لکھا گیا ہو گا۔
انہوں نے کہا کہ جب یہ فلم ریلیز ہوئی تو میری خالہ نے فوراً مجھے کال کی اور کہا کہ یہ فلم تو تمہارے کردار پر بنی ہے، میں نے بھی جب فلم دیکھی تو محسوس کیا کہ اس کردار میں مجھ سے کافی مماثلت ہے، میرا خیال ہے کہ ہدایت کار امتیاز علی نے مجھ سے ملاقات کی ہو گی تبھی انہوں نے گیت کا کردار ایسا لکھا۔
حرا مانی کے اس بیان کے بعد سوشل میڈیا پر صارفین کی جانب سے سخت ردِعمل سامنے آیا۔
کئی لوگوں نے ان پر خودپرستی کا الزام لگایا جبکہ کچھ نے مذاقاً کہا کہ وہ کرینہ کپور بننے کی کوشش کر رہی ہیں لیکن اصل ہمیشہ اصل ہی رہتا ہے۔
بعض نے کہا کہ یہ پاکستان کی اروشی روٹیلا ہیں، بس خود کی تعریفیں کرتی رہتی ہیں۔
حرا مانی کی جانب سے اس تنقید کا کوئی جواب سامنے نہیں آیا ہے۔
یہ پہلا موقع نہیں ہے جب حرا مانی کسی بیان کی وجہ سے تنازع کا شکار ہوئی ہوں، اس سے قبل بھی وہ متعدد غیر روایتی خیالات اور دلچسپ تبصروں کی وجہ سے خبروں میں رہ چکی ہیں۔
