فرمان الہی
نماز کے اوقات
پاکستان سپر لیگ (پی ایس ایل) سیزن 10 کے 24 ویں میچ میں لاہور قلندرز نے کراچی کنگز کو بارش سے متاثرہ میچ میں 161 رنز کا ہدف دیا ہے۔
قذافی اسٹیڈیم لاہور میں کھیلے جا رہے میچ میں کراچی کنگز نے ٹاس جیت کر لاہور قلندرز کو بیٹنگ کی دعوت دی، 8 ویں اوور میں میچ بارش سے متاثر ہوا تو اسے 15، 15 اوورز تک محدود کر دیا گیا۔
لاہور قلندرز نے فخر زمان اور محمد نعیم کی عمدہ بیٹنگ پرفارمنس کی بدولت مقررہ اوورز میں 8 وکٹ پر 160 رنز بنائے اور کراچی کنگز کے لیے 161 رنز کا ہدف سیٹ کیا۔
لاہور قلندرز کی پہلی وکٹ بارش سے بالکل پہلے گری، 7 اعشاریہ 5 اوورز میں فخر زمان اور محمد نعیم نے 90 رنز کی شراکت قائم کی، آؤٹ ہونے والے بیٹر نے 5 چھکے اور 6 چوکوں کی مدد سے 29 گیندوں پر 65 رنز کی باری کھیلی۔
فخر زمان 33 گیندوں پر 51 رنز بنا کر پویلین لوٹے، اُن کی اننگز 3 چھکوں اور 4 چوکوں سے مزین تھی، دیگر آؤٹ ہونے والے کھلاڑیوں میں عبداللّٰہ شفیق 18 رنز شامل تھے، باقی کوئی اور کھلاڑی ڈبل فیگر میں داخل نہ ہو سکا۔
کراچی کنگز کے عباس آفریدی نے 4، میر حمزہ، عامر جمال اور حسن علی نے 1، 1 وکٹ اپنے نام کی، ایونٹ میں عباس آفریدی کی وکٹوں کی تعداد 15 ہو گئی ہے۔
میچ میں لاہور قلندرز کی قیادت شاہین شاہ آفریدی جبکہ کراچی کنگز کی کپتانی کے ڈیوڈ وارنر کے سپرد ہے۔
اہم میچ کے لیے لاہور قلندرز کی ٹیم میں ایک تبدیلی کی گئی ہے، فاسٹ بولر ٹام کرن کی جگہ اسپنر رشاد حسین کو شامل کیا گیا ہے۔
دوسری طرف کراچی کنگز کی ٹیم میں 2 تبدیلیاں کی گئی ہیں، فواد علی اور عمیر بن یوسف کی جگہ حسن علی اور سعد کو اسکواڈ کا حصہ بنایا گیا ہے۔
پی ایس ایل کے پوائنٹس ٹیبل پر کوئٹہ گلیڈی ایٹر 8 میچ کے بعد 11 پوائنٹس کے ساتھ سرِ فہرست ہے جبکہ اسلام آباد یونائیٹڈ اتنے ہی میچز میں 10 پوائنٹس کے ساتھ دوسرے نمبر پر ہے۔
لاہور قلندرز کی نمبرز کی دوڑ میں تیسری پوزیشن ہے، جس کے پوائنٹس کی تعداد 9 ہے جبکہ کراچی کنگز 8 پوائنٹس کے ساتھ چوتھی اور پشاور زلمی 6 پوائنٹس کے ساتھ 5 ویں پوزیشن پر ہے۔
پوائنٹس ٹیبل کی آخری پوزیشن پر ملتان سلطانز کی ٹیم ہے، 8 میچز میں سے صرف 1 میں کامیابی حاصل کی اور اسے 7 میں شکست کا سامنا کرنا پڑا ہے، یہ ٹیم اب ایونٹ سے باہر ہو چکی ہے۔
