فرمان الہی
نماز کے اوقات
پہلے ٹی ٹوئنٹی میں بنگلادیش نے پاکستان کو 7 وکٹوں سے باآسانی ہرا دیا، 111 رنز کا ہدف بنگال ٹائیگرز نے 15 اعشاریہ 3 اوورز میں پورا کر لیا۔
سیریز کے پہلے ٹی ٹوئنٹی میں میزبان بنگلادیش کا پاکستان کے خلاف ٹاس جیت کر پہلے فیلڈنگ کا فیصلہ فائدہ مند ثابت ہوا۔
میزبان ملک کے بولرز نے گرین شرٹس کی آدھی ٹیم صرف 46 رنز پر پویلین پہنچا دی، اوپنر فخر زمان نے 44 رنز کی اننگز کھیلی، پاکستان کا ٹاپ آرڈر مکمل طور پر ناکام ہو گیا، صائم ایوب 6، محمد حارث 4، کپتان سلمان علی آغا 3 اور حسن نواز صفر پر آؤٹ ہوئے۔
میرپور میں کھلے جا رہے پہلے ٹی ٹوئنٹی میں بنگلا دیش نے پاکستان کے خلاف ٹاس جیت کر فیلڈنگ کرنے کا فیصلہ کیا، بنگلا دیش کے بولرز نے پاکستانی بیٹرز کو کریز پر کھڑا نہیں ہونے دیا۔
محمد نواز 3 اور خوشدل شاہ 17 رنز بنا کر آؤٹ ہوئے، فخر زمان 44 رنز بنا کر ٹاپ اسکورر رہے، فخر زمان نے جارحانہ انداز میں بیٹنگ کرتے ہوئے 6 چوکوں اور 1 چھکے کی مدد سے 44 رنز بنائے۔
آل راؤنڈر عباس آفریدی نے 3 چھکوں کی مدد سے 22 رنز اسکور کیے، گرین شرٹس نے 19 اعشاریہ 3 اوورز میں 10 وکٹوں پر 110رنز بنائے۔
بنگلادیش کے تسکین احمد نے 3 اور مستفیض الرحمٰن نے 2 کھلاڑیوں کو آؤٹ کیا۔
جواب میں بنگلادیش نے جارحانہ انداز میں بیٹنگ کی، ابتدا میں تنزید حسن اور لٹن داس کی 7 رنز پر وکٹیں گرنے کے بعد پرویز حسین اور توحید ہردوئی نے ٹیم کو سنبھالا دیا اور اسکور کو 80 رنز تک لے گئے۔
بنگلادیش کے تیسرے آؤٹ ہونے والے کھلاڑی توحید ہردوئی تھے جنہوں نے 2 چوکوں اور 2 چھکوں کی مدد سے 36 رنز بنائے جبکہ پرویز حسین نے 3 چوکوں اور 5 چھکوں کی مدد سے 56 رنز کی شاندار اننگز کھیلی اور ٹیم کی جیت میں اہم کردار ادا کیا۔
پاکستان کی طرف سے سلمان مرزا نے 2 اور عباس آفریدی نے 1 وکٹ حاصل کی۔
3 میچوں کی سیریز میں میزبان بنگلا دیش کو 1-0 کی برتری مل گئی۔
میزبان ٹیم نے کل پریکٹس اور پاکستانی ٹیم نے آرام کیا تھا۔
سیریز کی ٹرافی کی رونمائی ڈھاکا کے ہوٹل میں دونوں کپتانوں کی موجودگی میں گزشتہ روز کی گئی تھی۔
پاکستانی کپتان سلمان علی آغا کا پریس کانفرنس میں کہنا تھا کہ بنگلا دیش ہوم گراؤنڈ اور اپنی کنڈیشنز میں اچھی ٹیم ہے، چیلنجز کے بارے میں علم ہے، پوری تیاری کے ساتھ میدان میں اتریں گے۔
پاکستان کی پلیئنگ الیون میں کپتان سلمان آغا، اوپنر بلے باز فخرزمان، صائم ایوب، محمد حارث، حسن نواز، محمد نواز ، خوشدل شاہ، فہیم اشرف، ابرار احمد، سلمان مرزا اور عباس آفریدی شامل ہیں۔
بنگلادیش کی ٹیم میں کپتان لٹن داس، تنزید حسن، پرویز حسن، توحید ہردوئی، ذاکر علی، شمیم حسین، مہدی حسن، تسکین احمد، مستفیض الرحمٰن، رشاد حسین اور تنظیم حسن شامل ہیں۔
