فرمان الہی
نماز کے اوقات
راولپنڈی اور اسلام آباد میں تیز بارش سے نشیبی علاقے زیر آب آگئے۔
راولپنڈی کی نجی ہاوسنگ سوسائٹی کے فیز ایٹ میں پانی داخل ہوگیا اور ملحقہ دیہات میں بھی پانی داخل ہوگیا۔
شدید بارش سے متاثر ہونے والے گاؤں میں باغ راجگان، کھڑکن، سوہاوہ شامل ہیں۔
نشیبی علاقے زیر آب آنے سے پانی گھروں میں بھی داخل ہوگیا ہے۔
ٹریفک پولیس کے مطابق اڈیالا سرکل اور بسکٹ فیکٹری چوک پر بارش کے پانی کے باعث ٹریفک کی روانی متاثر ہے۔
ٹریفک پولیس نے بتایا کہ خواجہ کارپوریشن جانے والی سڑک پر پانی جمع ہے۔
ٹریفک پولیس نے سول لائنز سرکل میں پانی جمع ہونے کی وجہ سے وہاں سے گزرنے والوں کو گاڑی چلانے میں احتیاط کرنے کی ہدایت کی۔
ٹریفک پولیس کے مطابق یونیورسٹی چوک پر ٹریفک سست روی کا شکار ہے۔
واضح رہے کہ ایم ڈی واسا سلیم اشرف نے بتایا کہ راولپنڈی میں رین ایمرجنسی نافذ ہے اور واسا ہائی الرٹ ہے۔
اُنہوں بتایا کہ واسا راولپنڈی کے عملے کی تمام چھٹیاں منسوخ کردی گئی ہیں، شہر کی مجموعی صورتحال کنٹرول میں ہے، کسی خطرے کی بات نہیں۔
ایم ڈی واسا سلیم اشرف نے مزید بتایا کہ محکمہ موسمیات نے مزید بارشوں کی پیش گوئی کی ہے، بارشوں کے پیش نظر تمام انتظامات مکمل ہیں، شہر میں دفعہ 144 نافذ ہے، ندی نالوں میں نہانے پر پابندی ہے۔
اُنہوں نے بتایا کہ نالہ لئی کی مسلسل نگرانی کی جا رہی ہے، نالہ لئی میں کٹاریاں پر پانی کی سطح 6 فٹ ہے، گوالمنڈی کے مقام پر پانی کی سطح 5 فٹ ہے، نشیبی علاقوں میں ہیوی مشینری اور عملہ تعینات ہے، نشیبی علاقوں میں نکاسی آب کے لیے اضافی عملہ تعینات ہے۔
ایم ڈی واسا سلیم اشرف نے شہریوں سے بارش کے دوران برساتی نالوں سے دور رہنے کی اپیل بھی کی۔
سید پور میں 40، گولڑہ میں 15، شمس آباد میں 15، کچہری میں 28 ملی میٹر بارش ہوئی
