فرمان الہی
نماز کے اوقات
بنگلا دیش نے پاکستان کو سیریز کے دوسرے ٹی ٹوئنٹی میچ میں 8 رنز سے ہرا کر 3 میچوں کی سیریز میں 2-0 کی فیصلہ کن برتری حاصل کر لی۔
بنگلادیش کے 134 رنز کے تعاقب میں پاکستانی ٹیم 125 رنز بنا سکی، فہیم اشرف 51 رنز بنا کر نمایاں رہے۔
ڈھاکا میں کھیلے گئے دوسرے ٹی ٹوئنٹی میں بنگلا دیشی ٹیم کے اوپنر محمد نعیم 3 رنز بنا کر آؤٹ ہوئے، لٹن داس 8، توحید ہردوئے صفر پر جبکہ پرویز حسین 13 رنز بنا سکے۔
28 رنز پر 4 وکٹیں گرنے کے بعد ذاکر علی اور مہدی حسن نے اسکور 81 تک پہنچا دیا، مہدی حسن 33 رنز بنا کر آؤٹ ہو گئے، لیکن ذاکر علی آخر تک ڈٹے رہے اور اننگز کی آخری گیند پر 55 رنز بنا کر آؤٹ ہوئے۔
بنگلا دیش کی ٹیم مقررہ اوور میں 133 رنز بنا کر آؤٹ ہو گئی۔
ڈیبیو کرنے والے احمد دانیال نے 2 کھلاڑیوں کو آؤٹ کیا، سلمان مرزا اور عباس آفریدی نے بھی دو، دو وکٹیں حاصل کیں۔
ہدف کے تعاقب میں پہلے ہی اوور میں صائم ایوب رن آؤٹ ہوئے، پھر 15 رنز پر آدھی ٹیم پویلین لوٹ گئی۔
حارث صفر، فخر 8 رنز بنا سکے، حسن نواز اور محمد نواز بغیر کوئی رن بنائے آؤٹ ہو گئے۔
کپتان سلمان علی آغا نے 23 گیندوں پر 9 رنز بنائے، جب اسکور 47 تک پہنچا تو خوشدل شاہ بھی 13 رنز بنا کر آؤٹ ہو گئے۔
آل راؤنڈر فہیم اشرف نے پہلے عباس آفریدی کے ساتھ 26 گیندوں پر 41 رنز بنائے، پھر احمد دانیال کے ساتھ 17 گیندوں پر 33 رنز بنائے لیکن 19 ویں اوور کی آخری گیند پر 51 رنز بنا کر آؤٹ ہو گئے۔
آخری اوور میں 13 رنز درکار تھے جب احمد دانیال نے پہلی گیند پر چوکا لگایا لیکن دوسری گیند کو زوردار ہٹ لگاتے ہوئے باؤنڈری لائن پر آؤٹ ہو گئے۔
بنگلا دیش نے میچ 8 رنز سے جیت کر 3 میچوں کی سیریز میں 2-0 کی فیصلہ کن برتری حاصل کر لی۔
دوسرے ٹی ٹوئنٹی انٹرنیشنل میں پاکستان نے بنگلا دیش کے خلاف ٹاس جیت کر فیلڈنگ کا فیصلہ کیا تھا۔
شیر بنگلا اسٹیڈیم میں ٹاس کے موقع پر پاکستانی ٹیم کے کپتان سلمان علی آغا نے میڈیا سے گفتگو میں بتایا کہ پاکستان ٹیم میں ایک تبدیلی کی ہے۔
انہوں نے بتایا کہ ابرار احمد کی جگہ احمد دانیال کو فائنل الیون میں شامل کیا تھا جنہوں نے آج پہلا ٹی ٹوئنٹی انٹرنیشنل میچ کھیلا۔
میچ شروع ہونے سے پہلے اسٹیڈیم میں ایک منٹ کی خاموشی اختیار کی گئی۔
بنگلادیش کرکٹ بورڈ کی جانب سے ایئر فورس طیارہ حادثے پر ایک روزہ سوگ کا اعلان کیا گیا ہے۔
پاکستان کی فائنل الیون میں کپتان سلمان آغا کے علاوہ فخر زمان، صائم ایوب، محمد حارث، حسن نواز، محمد نواز، خوش دل شاہ، فہیم اشرف، عباس آفریدی، سلمان مرزا اور احمد دانیال شامل تھے۔
بنگلا دیش کی ٹیم میں کپتان لٹن داس کے علاوہ پرویز حسین، نعیم شیخ، توحید ہردوئے، شمیم حسین، ذاکر علی، مہدی حسن، رشاد حسین، تنظیم حسن، شریف الاسلام اور مستفیض الرحمٰن شامل تھے۔
