فرمان الہی
نماز کے اوقات
کیا پرانی محبت دوبارہ دستک دے رہی ہے؟ پاکستان کی صفِ اول کی اداکارہ اور ڈمپل کوئین ہانیہ عامر کی گلوکار عاصم اظہر کے کنسرٹ میں جھومتے گاتے ویڈیوز وائرل ہوگئیں، جس کے بعد سوشل میڈیا پر ہلچل مچ گئی۔
پاکستانی شوبز انڈسٹری کے معروف چہرے ہانیہ عامر اور عاصم اظہر ایک بار پھر خبروں کی زینت بن گئے ہیں، جب ہانیہ عامر کو عاصم اظہر کے کنسرٹ میں شرکت کرتے ہوئے دیکھا گیا۔
دونوں اسٹارز ماضی میں پاکستان کی سب سے پسندیدہ شوبز جوڑی سمجھے جاتے تھے، ان دونوں کا رشتہ 2018ء سے 2019ء تک شہ سرخیوں میں جگہ بناتا رہا، تاہم 2020ء میں ہانیہ عامر نے واضح کیا کہ وہ اور عاصم صرف اچھے دوست ہیں، بعدازاں عاصم اظہر نے ڈیجیٹل انفلوئنسر اور اداکارہ میرب علی سے منگنی کر لی، ان دونوں کا رشتہ بھی زیادہ عرصہ نہ چل سکا اور دونوں نے منگنی ختم کرنے کا اعلان کردیا۔
چند روز قبل سوشل میڈیا پر یہ قیاس آرائیاں شروع ہوئیں کہ شاید ہانیہ اور عاصم دوبارہ قریب آ رہے ہیں، مگر اس وقت تک ان کی کوئی مشترکہ تصویر سامنے نہیں آئی تھی۔ یہ افواہیں اس وقت تیز ہو گئیں جب ہانیہ عامر اور عاصم اظہر کو ریوائیو لانچ پارٹی میں ایک ساتھ دیکھا گیا۔
ہانیہ عامر سفید لباس اور چشمہ پہنے اپنی قریبی دوست یشمہ گل کے ہمراہ عاصم اظہر کے گانے پر جھومتی نظر آئیں، عاصم نے اپنا وائرل ہٹ ’سانگ ترستی ہیں نگاہیں‘ گایا، جس پر ہانیہ نے خوب انجوائے کیا۔
اس موقع کی تصاویر اور ویڈیوز سوشل میڈیا پر وائرل ہوگئیں، جہاں مداحوں کی جانب سے دلچسپ اور حیران کن تبصرے کیے جارہے ہیں۔
ایک صارف نے لکھا، ’اب وہ کنسرٹ بھی انجوائے نہیں کر سکتیں؟ رشتہ ختم ہو چکا، مگر دوستی باقی ہے، اتنی ہائپ بنانے کی ضرورت نہیں‘، دوسرے صارف نے طنزیہ انداز میں کہا، ’اب ہمیں ایکس اور نیکسٹ کا پورا ڈرامہ دیکھنا پڑے گا۔‘
ایک اور نے تبصرہ کیا، ’عاصم کی اصلی خوشی اب پھر نظر آ رہی ہے، میرب کے ساتھ تو سب کچھ زبردستی لگتا تھا‘، ایک صارف نے طنز کرتے ہوئے لکھا، ’لگتا ہے میرب نے سرف کھا لیا ہے۔‘
ایک اور نے کہا، ’شاید اسی وجہ سے عاصم نے میرب سے رشتہ ختم کیا اب سب کچھ واضح ہے‘، جبکہ کچھ سوشل میڈیا صارفین اسے ایک عام فنکارانہ ملاقات قرار دے رہے ہیں۔
