فرمان الہی
نماز کے اوقات
پنجاب کی وزیرِ اعلیٰ مریم نواز جاپان کے دورے پر ٹوکیو پہنچ گئیں۔
مریم نواز کی ٹوکیو میں ہوٹل آمد پر مسلم لیگ ن کے کارکنوں نے ان کا شاندار استقبال کیا۔
ن لیگ اوورسیز کے سابق جنرل سیکریٹری شیخ قیصر، صدر ملک نور اعوان اور چیئرمین ملک یونس نے مریم نواز کو گلدستے پیش کیے۔
مسلم لیگ ن جنوبی کوریا کے صدر راجہ عامر اقبال بھی اس موقع پر موجود تھے۔
شرکاء کا کہنا تھا کہ مریم نواز پاکستان میں ترقی اور خوش حالی کی علامت ہیں۔
مریم نواز کی آمد سے قبل ٹوکیو کے مقامی فائیو اسٹار ہوٹل میں مسلم لیگ ن جاپان کے کارکنان اور پاکستانی کمیونٹی کی بڑی تعداد پہلے ہی جمع تھی۔
پرجوش کارکنان بینرز اور پلے کارڈز اُٹھائے، نعرے لگاتے اور خوشی کا اظہار کرتے دکھائی دیے۔
استقبالیہ تقریب میں مسلم لیگ ن کے سابق انٹرنیشنل افیئرز کے جنرل سیکریٹری شیخ قیصر محمود، مسلم لیگ ن جاپان کے صدر ملک نور اعوان، چیئرمین ملک یونس، جنرل سیکریٹری شمس بٹ، سینیئر نائب صدر قدیر مغل، چوہدری عنصر، انفارمیشن سیکریٹری ملک کاشف اعوان، سینئر رہنما ناصر گجر، ابرار شاہ، وسیم کمبوہ، شاہد مجید، عاطف بٹ، عبد الستار سمیت درجنوں عہدیداران اور کارکنان شریک ہیں۔
اس موقع پر فضا مریم نواز زندہ باد اور نواز شریف قدم بڑھاؤ ہم تمہارے ساتھ ہیں کے نعروں سے گونج اٹھی۔
تقریب میں شریک رہنماؤں کا کہنا ہے کہ مریم نواز کی قیادت مسلم لیگ ن کے لیے نئی توانائی اور جذبہ لے کر آئی ہے اور ان کا دورۂ جاپان ناصرف پاکستان اور جاپان کے تعلقات میں خوش گوار پیش رفت کا ذریعہ ہو گا بلکہ اوورسیز پاکستانیوں کے ساتھ رشتوں کو مزید مستحکم کرنے کا بھی موقع فراہم کرے گا۔
مسلم لیگ ن جنوبی کوریا کے صدر راجہ عامر اقبال خصوصی طور پر جاپان پہنچے ہیں تاکہ مریم نواز کو خوش آمدید کہہ سکیں۔
اُنہوں نے میڈیا سے گفتگو میں کہا کہ مریم نواز کا یہ دورہ اوورسیز پاکستانیوں کے لیے خوش آئند ہے کیونکہ وہ ہمیشہ بیرونِ ملک پاکستانیوں کے مسائل کے حل میں گہری دلچسپی لیتی رہی ہیں۔
راجہ عامر اقبال کے مطابق اس دورے کے دوران ناصرف سیاسی کارکنان کو حوصلہ ملے گا بلکہ باہمی تعاون اور سرمایہ کاری کے نئے دروازے بھی کھلیں گے۔
شرکاء نے اس موقع پر کہا کہ مریم نواز شریف پاکستان میں ترقی اور خوش حالی کی علامت ہیں، اُن کی سیاست خدمت، شفافیت اور عوامی فلاح کے اصولوں پر مبنی ہے۔
اوورسیز پاکستانیوں نے امید ظاہر کی کہ وزیرِ اعلیٰ پنجاب اپنے دورۂ جاپان کے دوران ایسی پالیسیوں اور اقدامات کا اعلان کریں گی جو بیرونِ ملک مقیم پاکستانیوں کو براہِ راست فائدہ پہنچائیں گی۔
