فرمان الہی
نماز کے اوقات
پاکستان کے معروف یوٹیوبر سعد الرحمٰن المعروف ڈکی بھائی نے اعتراف جرم کر لیا۔
انہیں آن لائن بیٹنگ ایپس اور سٹے بازی کی تشہیر کے معاملے میں 16 اگست کو گرفتار کرکے نیشنل سائبر کرائم انویسٹی گیشن ایجنسی کے حوالے کیا گیا تھا۔
اب یوٹیوبر نے عدالت کے باہر میڈیا سے پہلی بار گفتگو کرتے ہوئے ناصرف اعتراف جرم کیا ہے بلکہ اپنے جرم پر معافی بھی مانگی ہے۔
سوشل میڈیا پر وائرل ویڈیو میں ڈکی بھائی کو یہ کہتے ہوئے دیکھا جاسکتا ہے کہ میں روسٹنگ کے زمانے سے روسٹنگ ویڈیوز بناتا تھا جو کہ ایک غیر اخلاقی کام ہے جس پر میں پوری قوم سے معافی مانگتا ہوں۔
انہوں نے مزید کہا کہ مجھے کچھ ایپس کی تشہیر کی پیشکش کی گئی، جس کی میں نے تصدیق کیے بغیر تشہیر کی، کیونکہ مذکورہ ایپس ٹی وی پر، بالخصوص پی ایس ایل میچز کے دوران بہت عام تھیں اس لیے میں نے ان کی تصدیق نہیں کی گویا یہ قانونی ہیں یا نہیں، اس پر بھی میں معافی چاہتا ہوں۔
واضح رہے کہ لاہور کی عدالت نے ابتداً این سی سی آئی اے کی استدعا منظور کرتے ہوئے یوٹیوبر سعد الرحمٰن کا 2 روزہ جسمانی ریمانڈ منظور کیا تھا، بعد ازاں عدالت میں پیشی کے بعد ان کے جسمانی ریمانڈ میں 4 روز کی توسیع کی گئی تھی۔
یوٹیوبر سعد الرحمٰن کو 23 اگست بروز ہفتہ ایف آئی اے نیشنل کرائم ایجنسی نے 4 روزہ جسمانی ریمانڈ مکمل ہونے پر جوڈیشل مجسٹریٹ کی عدالت میں دوبارہ پیش کیا، جہاں عدالت نے ان کا مزید 5 روزہ جسمانی ریمانڈ منظور کر لیا ہے۔
یہاں یہ بھی واضح رہے کہ بیٹنگ ایپ کیس میں ڈکی بھائی کی اہلیہ عروب جتوئی بھی نامزد ہیں تاہم لاہور کی سیشن عدالت نے ان کی عبوری ضمانت منظور کرتے ہوئے 30 اگست تک گرفتار نہ کرنے کا حکم دے رکھا ہے۔
