فرمان الہی
نماز کے اوقات
وزیر اطلاعات سندھ شرجیل میمن نے کہا ہے کہ ملک میں سیلابی صورتِ حال ہے، ریلا سندھ میں داخل ہو رہا ہے، سندھ حکومت مکمل طور پر الرٹ ہے۔
کراچی میں پریس کانفرنس کرتے ہوئے انہوں نے کہا کہ وزیر اعلیٰ مراد علی شاہ تمام صورتِ حال کو مانیٹر کر رہے ہیں، وزیر آبپاشی کو فیلڈ میں بھیجا ہوا ہے وہ بیراج کا دورہ کر رہے ہیں۔
شرجیل میمن کا کہنا ہے کہ سیلاب کی صورتِ حال کے ساتھ ساتھ اگر بارشیں ہوگئیں تو اس کے بھی انتظامات کیے گئے ہیں، چیئرمین بلاول بھٹو زرداری وزیراعلیٰ سندھ اور محکمے کے تمام افسران کے ساتھ رابطے میں ہیں۔
انہوں نے کہا کہ پنجاب میں جو تباہ کاری ہوئی ہے ہم پنجاب حکومت کے ساتھ ہیں، پنجاب کو ہر قسم کا تعاون کرنے کے لیے تیار ہیں، ریلیف کی صورت میں تمام بنیادی سہولتوں کا سامان ہے، کشتیوں کا بھی انتظام کیا ہوا ہے، عوام کو پریشان ہونے کی ضرورت نہیں۔ وزیراعلیٰ نے مانیٹرنگ سیل بھی قائم کیا ہے، 2010 کے سیلاب میں بہت زیادہ تباہی ہوئی تھی۔
ان کا کہنا تھا کہ ڈیم بنانے سے متعلق 3 صوبے اسمبلی میں قرارداد سے تحفظات کا اظہار کر چکے ہیں، ڈیم ہوتا تو بھی آفات سے بچا نہیں جا سکتا، قدرتی گزرگاہوں پر آبادی یاسوسائٹی قائم نہیں ہونی چاہیے۔
شرجیل میمن نے یہ بھی کہا کہ بلاول بھٹو بھی تمام متعلقہ لوگوں سے براہ راست رابطے میں ہیں، تمام اراکین اسمبلی کو بھی اپنے حلقوں میں رہنے کی ہدایت کی گئی ہے۔
