فرمان الہی
نماز کے اوقات
بھارت کے ایشیا کپ میں پاکستان کے ساتھ کھیلنے پر بھارتی کرکٹ بورڈ (بی سی سی آئی) کی وضاحت سامنے آگئی۔
بھارتی کرکٹ بورڈ کے سیکریٹری دیوجیت سائیکیا نے پاکستان کے ساتھ کھیلنے پر بھارتی پالیسی کے حوالے سے کہا کہ جہاں تک بی سی سی آئی کی بات ہے ہم مرکزی حکومت کو فالو کرتے ہیں۔
انہوں نے کہا کہ بھارت کی حالیہ پالیسی کے مطابق انٹرنیشنل ٹورنامنٹس میں بھارتی ٹیم کی شرکت پر پابندی نہیں، جہاں تک بی سی سی آئی کے مؤقف کا تعلق ہے، ہمیں وہی فالو کرنا پڑتا ہے جو مرکزی حکومت طے کرتی ہے۔
دیوجیت سائیکیا کا کہنا ہے کہ بھارت کی حالیہ نئی پالیسی کسی بھی کثیرالملکی یا بین الاقوامی ٹورنامنٹ میں شرکت سے متعلق نہیں روکتی، نئی پالیسی واضح طور پر کہتی ہے کہ مرکزی حکومت کی طرف سے ایسے ممالک کے خلاف کھیلنے پر کوئی پابندی عائد نہیں کی گئی ہے جو بھارت کے ساتھ دوستانہ تعلقات نہیں رکھتے۔
بھارتی کرکٹ بورڈ کے سیکریٹری نے کہا کہ اس لیے بھارت کو کسی بھی کثیرالملکی ٹورنامنٹ میں تمام میچز کھیلنے ہوں گے، ایشیا کپ ملٹی نیشنز ٹورنامنٹ ہے اسی لیے ہم شرکت کریں گے، اسی طرح آئی سی سی ٹورنامنٹس جس میں ایسے ممالک جن کے ساتھ بھارت کے اچھے تعلقات نہیں ہیں وہ ہمیں کھیلنا ہوگا۔
ان کا کہنا تھا کہ جہاں تک دوطرفہ تعلقات کی بات ہے وہاں ہم کسی دشمن ملک کے خلاف نہیں کھیلیں گے، ہم بھارتی حکومت اور اسپورٹس ڈیپارٹمنٹ کی بنائی ہوئی پالیسی پر عمل کر رہے ہیں، اس پالیسی میں نہ صرف کرکٹ بلکہ باقی کھیل بھی شامل ہیں۔
دیوجیت سائیکیا نے کہا کہ اگر بھارت کسی بھی کھیلوں کے ملٹی نیشنل ٹورنامنٹ میں کسی مخصوص ملک کے خلاف کھیلنے سے انکار کرتا ہے تو اس پر پابندیاں لگ سکتی ہیں، مثال کے طور پر اگر ایتھلیٹکس فیڈریشن پر پابندی لگتی ہے تو نیرج چوپڑا کسی انٹرنیشنل ایونٹ میں شرکت نہیں کرسکے گا اور یہ کھلاڑی کے لیے نقصان دہ ہو گا، بھارتی حکومت نے سوچ سمجھ کر یہ پالیسی بنائی ہے۔
