فرمان الہی
نماز کے اوقات
اقصٰی گیلانی
میری پوتی اتوار کی چھٹی پر مجھ سے ملنے آئی، مجھے اُسے دیکھ کر بہت خوشی ہوئی، اُسے مجھ سے بہت محبت ہے، اسی لیے اکثر میرا بیٹا اُسے میرے پاس چھوڑ جاتا ہے۔ میں اُن دادیوں میں سے ہوں، جن کے گھر میں کھلونے نہیں ہوتے، البتہ، سینے پرونے کا سامان بکھرا ہوتا ہے۔
کیوں کہ میں سلائی کڑھائی کا آڈر پر کام کرتی ہوں، یہی وجہ تھی کہ میں سوچ رہی تھی کہ ایسا کیا کروں جو میری پوتی کو بور نہ کرے؟ اچانک میری نظر بٹنوں والی برنی پر پڑی، میں نے چند گھنٹے قبل اپنے ایک آن لائن گاہک کے لیے سویٹر مکمل کیا تھا، اس میں بٹن ٹانکے تھے اور ابھی تک کام کی جگہ کی صفائی نہیں کی تھی، اس لیے بٹنوں کی برنی سامنے ہی رکھی تھی، مجھے بجلی کی طرح ایک خیال آیا، میں نے پوتی سے کہا، ’’بیٹی، کیا تم بٹنوں سے ایک جادوئی پھولوں کا کھیت بنانا چاہو گی؟‘‘
اس وقت اس کا چہرہ دیکھنے والا تھا، اس کی آنکھیں چمک اٹھیں، اُس نے کہا، ’’جی دادی ضرور‘‘ ہم نے کاغذ کا ایک بڑا ٹکڑا لیا، اس پر کچھ گھاس دھاگوں سے بنائی اور بٹنوں کو ایسے ترتیب دینا شروع کیا، جیسے وہ کسی گھاس کے میدان میں پھول ہوں۔ میری پوتی اسے بنانے میں بہت دلچسپی لے رہی تھی۔ ایک طرف سرخ، دوسری طرف پیلے، سبز رنگ کے بٹن پتوں کی طرح بکھرے ہوئے تھے، یہاں تک کہ اس نے کاغذ کی چھوٹی چھوٹی تتلیاں بھی کاٹ کر اوپر چپکا دیں۔
اسے بنانے میں ہمارے تین گھنٹے لگے، وہ ہر بٹن کو اٹھاتی، اسے گھما کر دیکھ کر، بالکل ٹھیک جگہ لگانے کا فیصلہ کرتی، جہاں اسے رکھنا ہوتا۔ وہ بٹنوں کو اُٹھا اُٹھا کر کہتی، ’’دادی، یہ والا گلاب جیسا لگتا ہے، یہ والا لیڈی بگ جیسا ہے۔‘‘
جب ہم نے اسے مکمل کیا، تو یہ اتنا خوبصورت لگ رہا تھا کہ میرا دل بٹنوں کو کاغذ سے الگ کرنے کو نہیں چاہا۔ میں نے سوچا کہ مجھے اس پروجیکٹ کی تصویر کو فیس بک پر شیئر کرنی چاہیے۔ مجھے یقین ہے کہ دوسری دادیوں کو اپنے پوتے پوتیوں کو مصروف رکھنے کے لیے یہ خیال بہت پسند آئے گا، پھر میں نے ایسا ہی کیا۔
کبھی کبھی سب سے سادہ چیزیں مہنگے بازار سے خریدے گئے کھلونوں سے زیادہ خوشی دیتی ہیں اور سب سے اچھی بات یہ کہ ہم نے وقت ایک ساتھ گزارا، اپنے ہاتھوں سے کچھ تخلیق کیا۔ یہ وقت کسی بھی شاندار تفریح سے زیادہ قیمتی ہے۔
اب وہ اگلے اتوار کی چھٹی پر ’’بٹنوں کا سمندر‘‘ بنانے کے لیے دوبارہ آنے کا کہہ کر گئی ہے۔ یا اللہ میری مدد کرنا، مجھے نیلے بٹن جمع کرنا شروع کر دینے چاہیئے، تاکہ ایک سمندر بناؤں۔
