فرمان الہی
نماز کے اوقات
جلال پور پیروالا میں سیلابی پانی کی کمی کیلئے ایم فائیو موٹروے پر شگاف ڈالنے کی تجویز دی گئی ہے۔
محکمہ انہار نے موٹروے پر شگاف ڈالنے کو انتہائی ضروری قرار دیا، چیئرمین نیشنل ہائی وے اتھارٹی (این ایچ اے) اور متعلقہ حکام پر مشتمل کمیٹی کے اجلاس میں تجویز کا جائزہ لیا گیا۔
سوئی گیس حکام کا کہنا ہے کہ شگاف ڈالنے سے 5 کلو میٹر طویل پائپ لائن متاثر ہوگی، اجلاس میں کمیٹی ارکان نے رائے دی کہ کل پانی کا بہاؤ دیکھ کرفیصلہ کیا جائے گا۔
محکمہ انہار کے مطابق 8 روز بعد بھی جلال پور پیروالا کے اطراف پانی میں معمولی کمی ہوئی، دریائے ستلج کا 40 فیصد پانی اوچ شریف کے شگاف سے ابھی بھی جلال پور اور لودھراں کی جانب جا رہا ہے، پانی کو دریائے چناب میں ڈالنے کیلئے موٹر وے پر شگاف ڈالنا ضروری ہے۔
سیلاب سے متاثرہ ملتان ایم فائیو موٹروے جلال پور پیروالا سے جھانگڑہ انٹرچینج تک چھٹے روز بھی بند ہے، متبادل راستوں پر ٹریفک بھیجا جا رہا ہے۔
دوسری جانب وفاقی وزیر مواصلات عبدالعلیم خان نے کہا ہے کہ ہر قیمت پر جلال پور پیر والا شہر کو بچانا حکومت کی ترجیح ہے، تین ہفتوں سے شہریوں کو محفوظ رکھنے کی کوششیں جاری ہیں۔
جلالپور پیر والہ میں سیلابی صورتحال کا جائزہ لیتے ہوئے وفاقی وزیر مواصلات عبد العلیم خان کا کہنا تھا کہ موٹروے کے ساتھ دونوں طرف 20 کلو میٹر تک سیلابی پانی موجود ہے۔ اگرچہ موٹروے کو توڑنا ایک آسان فیصلہ نہیں، لیکن شہریوں کی جان و مال کو زیادہ اہمیت دی جائے گی۔
انہوں نے کہا کہ پنجاب حکومت کو فیصلہ کرنا ہے ، این ایچ اے مکمل طور پر ان کے شانہ بشانہ کھڑی ہے۔ اس مقصد کے لیے این ایچ اے اور آبپاشی کے ماہرین پر مشتمل ایک ٹیکنیکل کمیٹی قائم کر دی گئی ہے جو مسلسل مانیٹرنگ کرے گی۔
