فرمان الہی
نماز کے اوقات
برطانیہ میں پاکستان کے ہائی کمشنر ڈاکٹر محمد فیصل نے کہا ہے کہ یومِ دفاع کے موقع پر ہر پاکستانی مادرِ وطن کے لیے اپنی وفاداری اور خدمت کے جذبے کو تازہ دم کرتا ہے۔
ان خیالات کا اظہار انہوں نے پاکستان ہائی کمیشن لندن میں یومِ دفاع کی تقریب کے موقع پر کیا، جس میں پاکستان کے سیلاب متاثرین کے ساتھ یکجہتی کا اظہار کیا گیا۔
ہائی کمشنر ڈاکٹر محمد فیصل نے قومی ترانے کی دھن پر پاکستان کا جھنڈا لہرایا، تقریب کے دوران ہائی کمیشن کے افسران اور عملہ موجود تھا۔
اپنے کلیدی خطاب میں ہائی کمشنر ڈاکٹر محمد فیصل نے وطنِ عزیز کے شہداء اور بہادر بیٹوں کو شاندار خراجِ تحسین پیش کرتے ہوئے کہا کہ ان کی قربانیاں پاکستان کو مزید مضبوط اور مستحکم بناتی ہیں۔
ڈاکٹر محمد فیصل نے کہا کہ مسلح افواج کی پیشہ ورانہ مہارت کو عالمی سطح پر تسلیم کیا گیا ہے، خاص طور پر کامیاب آپریشن بنیان مرصوص کے بعد جس کا اختتام معرکۂ حق پر ہوا۔
تقریب میں عہد کیا گیا کہ پوری قوم اپنی مسلح افواج کے ساتھ مل کر وطنِ عزیز کے خلاف مذموم عزائم کو ناکام بنانے اور پاکستان کی خودمختاری کو ہر قیمت پر تحفظ فراہم کرنے کے لیے متحد ہے۔
تقریب میں پاکستان کے امن و خوش حالی، شہداء، ہیروز اور سیلاب متاثرین کے لیے خصوصی دعا بھی کی گئی۔
خیال رہے کہ ہر سال پاکستان کے بیرونِ ملک سفارت خانے یومِ دفاع جوش و خروش کے ساتھ مناتے ہیں جہاں ڈیفنس اینڈ ڈپلومیٹک کور اور کمیونٹی ممبران کو مدعو کیا جاتا ہے، تاہم اس سال سیلاب سے متاثرہ افراد کے ساتھ اظہارِ یکجہتی کے لیے تقریبات کو انتہائی سادگی سے منایا گیا۔
