فرمان الہی
نماز کے اوقات
شائقین کرکٹ کی ایک اور خواہش پوری ہوگئی، ایک اور پاک بھارت فائنل ٹاکرا حقیقت بن گیا۔
پاکستان اور بھارت کے میچ میں جذبات ہوں یا جنون، تنقید ہو یا تعریف، کھلاڑیوں کے لیے ہر چیز دو گنا سے زیادہ شدت اختیار کرلیتی ہے اور اس مرتبہ بھی دونوں ملکوں کے کھلاڑیوں اور عوام نے ایسا ہی کچھ کرنے کی تیاری کرلی ہے۔
ایشیا کپ 2025 کے آغاز سے قبل ہی میچز کے شیڈول کو دیکھ کر شائقین کرکٹ نے زیادہ سے زیادہ پاک بھارت ٹاکرے کی دعائیں مانگنا شروع کردی تھیں اور اب یہ دعائیں تاریخی حقیقت بن گئی ہیں کیونکہ پاکستان اور بھارت کی ٹیمیں پہلی مرتبہ ایشیا کپ کے فائنل میں آمنے سامنے ہوں گی۔
جی ہاں! آپ نے بالکل درست پڑھا، دونوں ٹیمیں آج تک ایشیا کپ کے فائنل میں آمنے سامنے نہیں آئی ہیں۔ یہ پہلا موقع ہے جب دونوں ٹیمیں اس ایونٹ کے فائنل میں ٹرافی کی جنگ کے لیے اتوار کو میدان میں اتریں گی۔
1984میں شروع ہونے والا یہ ٹورنامنٹ پاک بھارت ٹاکروں کی وجہ سے ہر مرتبہ ہی شائقین کرکٹ اور کرکٹ کے دیوانوں کے لیے بہت ہی خاص رہا ہے۔
1984 سے لے کر 2025 تک اس ٹورنامنٹ نے کرکٹ کے لاکھوں نہیں بلکہ کروڑوں دیوانوں کو زبردست پاک بھارت ٹاکرے دیکھنے کا موقع دیا، لیکن فائنل میں روایتی حریف کبھی آمنے سامنے نہیں آئے۔ اس مرتبہ اب ایسا ممکن ہوگیا کیونکہ تاریخ میں پہلی مرتبہ ایشیا کپ کا فائنل پاکستان اور بھارت کے درمیان کھیلا جائے گا۔
حالیہ پاک بھارت جنگ کے بعد ایشیا کپ ٹورنامنٹ نے سرحد کے دونوں اطراف اور دنیا بھر میں شائقین کرکٹ کو موقع دیا کہ دونوں ملکوں کی ٹیموں کو ایک دوسرے کے خلاف میدان میں ایکشن میں دیکھ سکیں۔
دبئی کرکٹ اسٹیڈیم میں اتوار کو یہ تاریخی میچ پاکستانی وقت کے مطابق رات ساڑھے 7 بجے شروع ہوگا۔ اب تک اس ٹورنامنٹ میں 2 پاک بھارت ٹاکرے ہوئے اور دونوں ہی بھارت نے جیتے۔
کون کون سی ٹیمیں ایشیا کپ جیت چکی ہیں؟
ماضی کی بات کی جائے تو ایشیا کپ ٹورنامنٹ صرف 3 ٹیمیں ہی جیتتی چلی آئی ہیں جن میں پاکستان بھارت اور سری لنکا شامل ہیں۔ ان تین ٹیموں میں سب سے زیادہ مرتبہ ایشیا کپ بھارت نے جیتا ہے۔
اب تک بھارت 8 مرتبہ ایشیا کپ جیت چکا ہے، سری لنکا نے 6 مرتبہ ٹرافی اٹھائی اور پاکستان 2 مرتبہ چیمپئن بنا۔
پاکستان نے پہلی مرتبہ 2000ء میں معین خان اور دوسری مرتبہ 2012ء میں مصباح الحق کی قیادت میں ایشیا کپ ٹورنامنٹ جیتا تھا اور دونوں مرتبہ پاکستان ٹیم نے یہ ٹورنامنٹ 50 اوورز کے فارمیٹ میں جیتا تھا۔
واضح رہے کہ 2014 کے بعد سے یہ ٹورنامنٹ ہر مرتبہ ایک بار ون ڈے اور اگلی مرتبہ ٹی ٹوئنٹی فارمیٹ پر کھیلا جارہا ہے۔
