فرمان الہی
نماز کے اوقات
ایشیا کپ 2025 کی ٹرافی کے معاملے پر بھارتی کرکٹ ٹیم کے کپتان سوریا کمار یادیو کو ان کے ہی صحافی نے آئینہ دکھا دیا۔
پاک بھارت کا فائنل، بھارت کے نام رہا۔ میچ جیتنے کے بعد بھارتی کھلاڑیوں نے ایشین کرکٹ کونسل کے مختلف ممبران سے انعامات وصول کیے۔
تاہم بھارتی ٹیم نے اے سی سی کے سربراہ محسن نقوی سے ٹرافی اور میڈل لینے سے انکار کر دیا، جس پر ایشین کرکٹ کونسل نے ٹرافی اور میڈل واپس آفس میں پہنچا دیئے۔
محسن نقوی اور دیگر مہمانوں کے جانے کے بعد بھارتی ٹیم اسٹیج پر آئی اور ٹرافی و میڈل کے بغیر اسٹیج پر گروپ فوٹو اور جشن منایا۔
بعدازاں میڈیا سے گفتگو کے دوران بھارت کی جیت مگر کھیل کی ہار پر بھارتی صحافی نے سوریا کمار یادیو سے سخت سوال پوچھا۔
بھارتی صحافی نے اپنے کپتان سے پوچھا کہ انڈیا جیت تو گیا لیکن کیا آپ یہ کہیں گے کہ کھیل کی ہار ہوگئی؟ کیونکہ آپ کو ٹرافی نہیں ملی، ایسا تاریخ میں کبھی نہیں ہوا، ہم میں سے کسی نے کبھی ایسا نہیں دیکھا، انتظامیہ کی طرف سے جیسے بیانات آئے، ہم نے آئے دن کوئی نہ کوئی اشتعال انگیزی دیکھی، انڈیا بے شک جیت گیا لیکن کھیل ہار گیا۔
صحافی کے سوال کا جواب دیتے ہوئے بھارتی کپتان نے کہا کہ آپ مثبت چیز پر توجہ دیں۔
انہوں نے کہا کہ میرا خیال ہے آپ نے سب کچھ کہہ دیا، انڈیا جیت گیا، تو آپ مثبت چیزیں دیکھیں۔ ہم پورے ٹورنامنٹ میں ناقابل شکست رہے، کھلاڑیوں نے اچھا پرفارم کیا۔ ٹرافی نہ ملنے کے باوجود بھی آپ ہمارے چہروں پر مسکراہٹ دیکھ رہے ہیں۔
ایک اور صحافی نے انہیں آئینہ دکھاتے ہوئے پوچھا کہ آج آپ چیمپئن بنے، آپ نے اچھی گیم کھیلی لیکن اس پورے ٹورنامنٹ میں آپ کا پاکستانی ٹیم کے ساتھ جو رویہ رہا، ہاتھ نہیں ملایا، ٹرافی کے لیے فوٹو سیشن نہیں کیا، پھر آپ نے سیاسی بیان دیا، آپ کرکٹ کی تاریخ میں پہلے کپتان ہیں جو کرکٹ کے میدان میں سیاست لے کر آئے۔
صحافی کے سوال پر سوریا کمار آئیں بائیں شائیں کرنے لگے اور ڈھٹائی دکھاتے ہوئے کہا کہ مجھے آپ کا سوال سمجھ نہیں آیا۔
