فرمان الہی
نماز کے اوقات
ٹینس کی دنیا کے عظیم ترین کھلاڑیوں میں شمار ہونے والے نوواک جوکووچ ممکنہ طور پر جلد ہی اپنے شاندار کیریئر کا اختتام کرنے والے ہیں۔
38 سالہ سربین اسٹار سے متعلق یہ دعویٰ سابق عالمی نمبر ایک ڈبلز پلیئر رینی اسٹبز نے کیا ہے، جنہوں نے انکشاف کیا کہ جوکووچ شاید 2026ء کے آسٹریلین اوپن کے بعد ریٹائرمنٹ کا اعلان کر دیں۔
رینی اسٹبز نے ایک انٹرویو میں گفتگو کرتے ہوئے کہا کہ مجھے لگتا ہے کہ آسٹریلین اوپن ان کا آخری بڑا ٹورنامنٹ ہوگا، وہ شاید اس کے بعد مزید کھیلنے یا فرنچ اوپن جیسی تھکا دینے والی چیمپئن شپ میں حصہ لینے کے خواہشمند نہیں۔
انہوں نے مزید کہا کہ جوکووچ ہر سطح پر بہترین ہیں، لیکن اب انہیں کورٹ پر نوجوان کھلاڑیوں کے خلاف پانچ سیٹ کے میچز جیتتے دیکھنا مشکل لگتا ہے اور پھر ومبلڈن کھیلنا مزید چیلنج ہوگا۔
رینی کے مطابق آسٹریلین اوپن سے اپنے کیریئر کا اختتام کرنا جوکووچ کے لیے ایک خوبصورت اور تاریخی لمحہ ہوگا، کیونکہ انہیں اپنا پہلا گرینڈ سلم ٹائٹل بھی وہیں حاصل ہوا تھا۔
واضح رہے کہ جوکووچ اس وقت شنگھائی ماسٹرز میں مصروف ہیں، جہاں وہ اپنا پانچواں ٹائٹل جیتنے کی کوشش کر رہے ہیں، جو ایک نیا ریکارڈ ثابت ہوگا۔
جوکووچ کو تاریخ کے سب سے کامیاب ٹینس کھلاڑیوں میں سے ایک سمجھا جاتا ہے، وہ اب تک 24 گرینڈ سلم سنگلز ٹائٹلز جیت چکے ہیں جو کسی بھی مرد کھلاڑی کے لیے سب سے زیادہ ہیں۔
تاہم 2023ء کے یو ایس اوپن کے بعد سے جوکووچ کوئی نیا گرینڈ سلم جیتنے میں کامیاب نہیں ہوئے، جس کی بنیادی وجہ سال 2025ء کے دوران مسلسل چوٹوں اور فٹنس کے مسائل کو قرار دیا جا رہا ہے۔
